නිදහස් අධ්යාපනය සහ සෞඛ්ය සේවාව ශ්රී ලංකාවේ සුබසාධන රාජ්යයේ පදනම වුවද, වර්තමාන අධ්යාපන පද්ධතිය රැකියා වෙළෙඳපොළේ අවශ්යතා සමඟ නොගැළපීම විශාල ගැටලුවක් බව විපක්ෂ නායක සජිත් ප්රේමදාස මහතා පවසයි. කොළඹ පිහිටි විපක්ෂ නායක කාර්යාලයේදී ඕස්ට්රේලියානු ජාත්යන්තර කටයුතු ආයතනයේ (AIIA) නියෝජිත පිරිසක් හමුවූ අවස්ථාවේදී ඔහු මේ බව සඳහන් කළේය.
එහිදී විපක්ෂ නායකවරයා පෙන්වා දුන්නේ පවතින පාසල් පද්ධතිය තුළ විෂමතා පවතින බවයි. රට පුරා පාසල් 10,000කට අධික සංඛ්යාවක් තිබුණත්, ජාතික සහ ප්රමුඛ පාසල් සීමිත සංඛ්යාවක් පමණක් වැඩි පහසුකම් භුක්ති විඳින බවත්, බහුතරයක් පාසල් තවමත් අඩු පහසුකම් යටතේ ක්රියාත්මක වන බවත් ඔහු අවධාරණය කළේය. සුබසාධන රාජ්යයක අරමුණ අසමානතා අවම කිරීම වුවද, වර්තමාන පද්ධතිය තුළ එම විෂමතා තවදුරටත් පුළුල් වී ඇති බවද ඔහු වැඩිදුරටත් පැවසීය.
කටපාඩම් කිරීම මත පදනම් වූ අධ්යාපනය, පාසල් විෂය නිර්දේශවල පවතින නොගැළපීම් සහ භාෂා අයිතිවාසිකම් දේශපාලනීකරණය වීම අධ්යාපන ක්ෂේත්රයට අහිතකර ලෙස බලපා ඇති බව විපක්ෂ නායකවරයා මෙහිදී පෙන්වා දුන්නේය. එම ව්යුහාත්මක ගැටලු විසඳා ගැනීමට සහ ආයෝජන හිතකාමී පරිසරයක් ගොඩනැගීම සඳහා ශ්රී ලංකාවේ ආර්ථික වර්ධනය සහ තරඟකාරීත්වය ශක්තිමත් කිරීම අත්යවශ්ය බව ඔහු අවධාරණය කළේය.
AIIA කවුන්සිලයේ සාමාජික සහ දකුණු ආසියානු වැඩසටහනේ සම-ප්රධානී ප්රකාශ් මිර්චාන්දනි සහ රිචඩ් අයන් යන මහත්වරුන්ගේ ප්රධානත්වයෙන් පැමිණි ඕස්ට්රේලියානු සහ කැනේඩියානු විද්වතුන්, හිටපු රාජ්ය තාන්ත්රිකයින් ඇතුළු නියෝජිත පිරිසක් මෙම සාකච්ඡාවට එක්ව සිටියහ. ශ්රී ලංකාවේ වත්මන් දේශපාලන, ආර්ථික සහ සමාජීය භූ දර්ශනය පිළිබඳව මෙහිදී පුළුල් ලෙස සාකච්ඡා කෙරිණි.
