පාසල නිමවීමෙන් පසු පියා සමඟ මෝටර් රථයකින් ආපසු නිවස බලා යමින් සිටි 17 හැවිරිදි පාසල් සිසුවෙකු මරදාන ප්රදේශයේදී හදිසියේම පලාගොස් අතුරුදන්වීමේ සිදුවීමක් සම්බන්ධයෙන් කොටුව පොලිසිය විසින් පරීක්ෂණ ආරම්භ කර තිබේ. බත්තරමුල්ල ප්රදේශයේ පදිංචිව සිටි සිසුවෙකු මෙලෙස අතුරුදන් වී ඇත.
සිද්ධිය වූ ඉකුත් සිකුරාදා (31) දින සිසුවා ඉගෙනුම ලබන මරදාන ප්රදේශයේ විදුහල අසලට මෝටර් රථයෙන් පැමිණි පියා, ඔහුව රථයට නංවාගෙන ඡායා පිටපතක් ලබාගැනීමේ අවශ්යතාවක් සඳහා කොළඹ සිනමා හලක් ආසන්නයේ පිහිටි ආයතනයක් වෙත ගොස් ඇත. එහිදී අදාළ ඡායා පිටපත ලබාගෙන නැවත මෝටර් රථය අසලට පැමිණි සිසුවාට රථයට ගොඩවන ලෙස පියා දැනුම් දී තිබේ. එම අවස්ථාවේදී එකවරම ක්රියාත්මක වූ සිසුවා, වාහනයේ පිටුපස දෙසින් කොම්පඤ්ඤ වීදිය දෙසට වේගයෙන් දිව ගොස් ඇත.
පියා සමඟ මෝටර් රථයේ සිටि සිසුවාගේ බාල සොහොයුරා ඔහු පසුපස හඹා ගියද, අතුරුදන් වූ සිසුවා අල්ලා ගැනීමට නොහැකි වී තිබේ. අනතුරුව පියා විසින් ලේක් හවුස් වටරවුමෙන් මෝටර් රථය හරවා කොම්පඤ්ඤ වීදිය දෙසට පදවාගෙන ගොස් සෙවීම් සිදුකළ ද සිසුවා සොයාගැනීමට හැකි වී නැත.
අදාළ සිසුවා මීට පෙරද අවස්ථා දෙකකදී මෙලෙස පලාගොස් පසුදින ආපසු නිවසට පැමිණ ඇති අතර, ඉකුත් 31 වැනිදා සිදුවූ මෙම සිද්ධියෙන් පසු ඊයේ (02) වන තෙක්ම ඔහු පෙරළා නිවසට පැමිණ නොමැති බව පොලිසිය පවසයි. කොටුව පොලිස් ස්ථානාධිපති ප්රධාන පොලිස් පරීක්ෂක දිලීප සී. පෙරේරා මහතාගේ උපදෙස් මත සිද්ධිය සම්බන්ධයෙන් වැඩිදුර විමර්ශන ක්රියාත්මක වේ.
