රජය විසින් ඉන්ධන මිල ඉහළ දැමීමට ගන්නා ක්රියාමාර්ග සහ වත්මන් පාලනාධිකාරියේ ක්රියාකලාපය දැඩි ලෙස විවේචනය කරමින් බත්තරමුල්ලේ සීලරතන හිමියන් අද (23) මාධ්ය හමුවේ අදහස් පළ කළහ.
එහිදී අග්රාමාත්ය හරිනි අමරසූරිය මහත්මියගේ භාවිතය සහ රජයේ ප්රතිපත්ති සම්බන්ධයෙන් දැඩි විවේචනයක් එල්ල කළ උන්වහන්සේ, ඉන්ධන මිල රුපියල් 700ක් දක්වා ඉහළ දැමීමට රජය කටයුතු කරන්නේ නම්, එය මහජනතාවට දරාගත නොහැකි බරක් බව පෙන්වා දුන්හ.
“පෙර වරප්රසාද එපා යැයි කියූ ඔබලා, අද අධි සුඛෝපභෝගී වාහනවල ගමන් කරනවා. රුපියල් 700ට තෙල් මිල ඉහළ දැමුවහොත් ජනතාව ඔබලාට පාරේ ගමන් කිරීමට ඉඩ නොදෙනු ඇති. ජනතාවගේ පීඩනය නොසලකා කටයුතු කළහොත් මිනිසුන් ඔබලා පසුපස පන්නා ගසා බේරේ වැවට දමනු ඇත,” යැයි උන්වහන්සේ ආවේගශීලීව ප්රකාශ කළහ.
තවදුරටත් අදහස් දැක්වූ සීලරතන හිමියන්, ජනාධිපතිවරයාගෙන් සහ මුදල් අමාත්යාංශයෙන් ඉල්ලා සිටියේ, ජනතාවගේ යහපත උදෙසා වහාම ඉන්ධන මිල පහළ දැමීමට පියවර ගන්නා ලෙසයි. තෙල් මිල ඉහළ යාම හේතුවෙන් බස් ගාස්තු ඉහළ දැමීම ද සාධාරණීකරණය කළ නොහැකි බවත්, ජනතාවට සහන ලබා දීම රජයේ වගකීමක් බවත් උන්වහන්සේ අවධාරණය කළහ.
