උතුම් සේරුවිල මංගල මහා සෑ රජුන් උදෙසා පවත්වනු ලබන 103 වන ඓතිහාසික සේරුවිල ශ්රී ලලාට ධාතු මහ පෙරහැර ශ්රී දළදා මාලිගාවේ මියන්රාජා මංගල හස්තිරාජයාගේ සදාතුක කරඬු වැඩමවීමෙන් අති උත්කර්ෂවත් අයුරින් ඊයේ (05) රාත්රියේ වීථි සංචාරය කළේය. මහා විහාර වංශික ශ්රී ලංකා අමරපුර මහා නිකායේ ශ්රී කල්යාණි වංශ පාර්ශ්වයේ මහා නායක, දෙවිනුවර ශ්රී පරම විචිත්රාරාම රජමහා විහාරාධිපති අතිපූජ්ය ආචාර්ය දෙවිනුවර සිරි සුනන්ධාභිදාන මහානායක ස්වාමීන් වහන්සේ ඇතුළු මහා සංඝරත්නයේ ආශීර්වාදය හා සේරුවිල මංගල රජමහා විහාරාධිපති පූජ්යපාද අළුදෙණියේ සුබෝධි නාහිමිපාණන් වහන්සේගේ මෙහෙයවීමෙන් මෙම සාම්ප්රදායික පුණ්යෝත්සවය සංවිධානය කර තිබිණි.
බුද්ධශාසන, ආගමික සහ සංස්කෘතික කටයුතු අමාත්ය ආචාර්ය හිනිදුම සුනිල් සෙනෙවි, විදේශ කටයුතු සහ විදේශ රැකියා නියෝජ්ය අමාත්ය අරුන් හේමචන්ද්ර මෙන්ම නැගෙනහිර පළාත් ආණ්ඩුකාර මහාචාර්ය ජයන්ත ලාල් රත්නසේකර ඇතුළු රාජ්ය නියෝජිතයන් සහ උත්තරීතර ආරාධිතයන් රැසක් මෙම ඓතිහාසික පුණ්යකර්මය සඳහා එක්ව සිටියහ. ඓතිහාසික සේරුවිල බෞද්ධ උරුමය සුරක්ෂිත කරමින් සහ ජාතික හා ආගමික සහජීවනය තහවුරු කරමින් පැවැත්වෙන මෙම මංගල්යය, මෙරට සංස්කෘතික අනන්යතාව ඉස්මතු කර පෙන්වන ප්රධාන පෙළේ ජාතික මට්ටමේ වාර්ෂික මහෝත්සවයක් ලෙස සැමගේ අවධානයට ලක්ව තිබේ.
මෙවැනි ඓතිහාසික ආගමික උත්සව අඛණ්ඩව සංවිධානය කිරීම හරහා රටේ සංස්කෘතික පුනර්ජීවනය මෙන්ම ප්රදේශයේ ආගමික සංචාරක ව්යාපාරය නංවාලීමට ද ඉමහත් පිටුවහලක් ලැබෙනු ඇතැයි අපේක්ෂා කෙරේ. ඉදිරි දිනවලදීත් පෙරහැර මංගල්යයේ ආගමික වතාවත් අතිශය භක්තිමත්ව සිදුකෙරෙන අතර, එය සමස්ත ජාතියේම අධ්යාත්මික සුවය උදෙසා ඉමහත් ආශීර්වාදයක් වනු නිසැකය.
