කොලොම්බියානු සුපිරි ගායිකා ශකීරා විසින් බ්රසීලයේ රියෝ ද ජැනේරියෝ නුවර කොපකබානා වෙරළ තීරයේ පවත්වන ලද නොමිලේ පැවැත්වූ ප්රසංගය නැරඹීම සඳහා මිලියන දෙකකට අධික රසික පිරිසක් එක්රොක් වී සිටි අතර එය ඇයගේ සංගීත දිවියේ මෙතෙක් පැවැත්වූ විශාලතම ප්රසංගය ලෙස වාර්තා පොත් අතරට එක් විය. සංචාරක ව්යාපාරය ප්රවර්ධනය කිරීම අරමුණු කරගනිමින් රජයේ අනුග්රහයෙන් ක්රියාත්මක වන “Todo Mundo no Rio” උළෙලේ කොටසක් ලෙස මෙම ප්රසංගය සංවිධානය කර තිබූ අතර මීට පෙර මැඩෝනා සහ ලේඩි ගාගා වැනි ලෝක ප්රකට තරු ද මෙම වෙරළ තීරයේ මෙවැනිම දැවැන්ත ප්රසංග පවත්වා ඇත.
ප්රසංගය ආරම්භයේදී ඩ්රෝන යානා යොදා ගනිමින් ශකීරාගේ සංකේතයක් වන වෘකයෙකුගේ රුවක් අහසේ ප්රදර්ශනය කිරීම විශේෂත්වයක් වූ අතර ඇය පෘතුගීසි භාෂාවෙන් ජනතාව අමතමින් තමාගේ ආදරය බ්රසීල ජනතාව වෙත පළ කළාය. තම අසමසම ගායන හා නර්තන විලාසයෙන් රසිකයන් පිනවූ ඇය “Hips Don’t Lie,” “Antologia” සහ 2010 ලෝක කුසලාන පාපන්දු තරගාවලියේ නිල ගීතය වූ “Waka Waka” ඇතුළු ජනප්රිය ගීත රාශියක් ගැයූ අතර ඇනිටා, කේටානෝ වෙලෝසෝ, මරියා බෙතනියා සහ ඉවෙටේ සංගාලෝ යන බ්රසීලියානු තරු ද වේදිකාවට එක්වී ශකීරා සමඟ ගායනයෙන් දායක විය.
නගර බලධාරීන් පවසන පරිදි මෙම ප්රසංගය හේතුවෙන් හෝටල්, අවන්හල් සහ ප්රවාහන සේවා ඇතුළු ක්ෂේත්ර රැසකට විශාල ආර්ථික වාසියක් හිමිව ඇති අතර රියායිස් මිලියන 800ක ආදායමක් නගරයට ලැබී තිබේ. මෙම දැවැන්ත උත්සවය අවම වශයෙන් 2028 වසර දක්වා රියෝ නගරයේ නිල උත්සව දින දර්ශනයේ පවතිනු ඇති බව ද බලධාරීන් තහවුරු කරයි.
