රාජ්ය සේවකයින්ගේ දැනුම, කුසලතා සහ ආකල්ප නවීන ලෝකයට ගැළපෙන පරිදි යාවත්කාලීන කිරීමේ අරමුණින් රාජ්ය පරිපාලන අමාත්යාංශය මගින් හඳුන්වා දුන් “SkillUpGov” නිල YouTube නාලිකාව ඊයේ (21) නිල වශයෙන් ආරම්භ කරන ලදී. නාරාහේන්පිට පිහිටි “නිලමැදුර” ශ්රවණාගාරයේදී පැවැති රාජ්ය පරිපාලන, පළාත් සභා හා පළාත් පාලන අමාත්යාංශයේ මාසික ප්රගති සමාලෝචන රැස්වීමට සමගාමීව, අමාත්ය මහාචාර්ය චන්දන අබයරත්න මහතාගේ ප්රධානත්වයෙන් මෙම සමාරම්භය සිදු විය.
මෙම ව්යාපෘතිය අමාත්යාංශයේ මානව සම්පත් සංවර්ධන අංශය මගින් ක්රියාත්මක කර ඇති අතර, එහි ප්රධාන අරමුණ වන්නේ තාක්ෂණය උපයෝගී කරගනිමින් රාජ්ය නිලධාරීන්ගේ පුහුණු අවශ්යතා කාර්යක්ෂමව සපුරාලීමයි. විශේෂයෙන්ම වෘත්තීය දැනුම යාවත්කාලීන කිරීම සහ නවීන රාජ්ය සේවයට අත්යවශ්ය තාක්ෂණික පියවර හඳුන්වා දීම මෙම නාලිකාව හරහා සිදු කෙරේ. මෙහිදී අදහස් දැක්වූ අමාත්යවරයා අවධාරණය කළේ මහජන සේවාවන් වඩාත් විනිවිදභාවයකින් සහ කඩිනමින් ඉටුකිරීම සඳහා මෙවැනි තාක්ෂණික මෙවලම් භාවිත කිරීම අත්යවශ්ය බවයි.
මෙම අවස්ථාවට අමාත්යාංශ ලේකම් එස්. ආලෝකබණ්ඩාර මහතා ඇතුළු රාජ්ය පරිපාලන, ස්වදේශ කටයුතු, පළාත් සභා සහ පළාත් පාලන යන අංශවල ආයතන ප්රධානීන් සහ ජ්යෙෂ්ඨ රාජ්ය නිලධාරීන් රැසක් සහභාගී වූහ. එදින පැවැති ප්රගති සමාලෝචන රැස්වීමේදී පසුගිය මාසයේ අමාත්යාංශය යටතේ පවතින ආයතන ලැබූ ප්රගතිය මෙන්ම ඉදිරි සැලසුම් පිළිබඳව ද දීර්ඝ වශයෙන් සාකච්ඡා කෙරිණි.
