ශ්රී ලංකා ක්රිකට් ආයතනයේ ගිණුම් සම්මත කරගනිමින් මූල්ය මෙහෙයුම් යථාවත් කිරීමට අපොහොසත් වුවහොත්, ඉදිරියේදී එම ආයතනය බරපතළ මූල්ය අර්බුදයකට මුහුණ දෙනු ඇති බව අභ්යන්තර ආරංචිමාර්ග අනාවරණය කරයි. මේ වන විට ක්රිකට් පරිපාලනය සඳහා පත් කර ඇති අතුරු කමිටුවට හෙවත් පරිවර්තනීය කමිටුවට මුදල් හැසිරවීමේ බලයක් නොමැති වීම මෙම තත්ත්වයට ප්රධාන හේතුව වී තිබේ.
පවතින අවිනිශ්චිත තත්ත්වය හමුවේ ක්රිකට් ආයතනයේ සාමාජිකයන් විසින් ගිණුම් සම්මත කරන තෙක් හෝ නව නිලවරණයකින් ස්ථාවර පාලනයක් පත්වන තෙක් ජාත්යන්තර ක්රිකට් කවුන්සිලයෙන් (ICC) ලැබෙන මූල්ය ප්රතිපාදන මෙරටට නොලැබෙනු ඇතැයි වාර්තා වේ. ක්රිකට් අතුරු කමිටුව පත්වන විට ආයතනය සතුව පැවැතියේ ඉදිරි මාස තුනක කාලයකට පමණක් සෑහෙන මූල්ය ශක්තියක් බව ද පැවසේ.
මූල්ය ස්ථාවරත්වය වෙනුවෙන් ඉන්දියාව සමඟ පැවැත්වීමට සැලසුම් කර තිබූ අතිරේක ක්රිකට් තරග 6 කාවලිය ද මේ වන විට අවිනිශ්චිත මට්ටමකට පත්ව ඇත. එසේම මුදල් හැසිරවීමේ බලයක් නොමැතිකම නිසා ක්රිකට් ආයතනයට භාණ්ඩ හා සේවා සපයන සැපයුම්කරුවන්ට අදාළ ගෙවීම් සිදු කිරීමට නොහැකි වී ඇති අතර, මේ හේතුවෙන් ඉදිරියේදී සැපයුම්කරුවන්ගෙන් දැඩි පීඩනයක් එල්ල විය හැකි බව සඳහන් වේ. මෙම අර්බුදකාරී තත්ත්වයෙන් මිදීම සඳහා මැයි මස 31 වැනිදා වාර්ෂික මහ සභාව කැඳවීමට කටයුතු සූදානම් වෙමින් පවතින අතර, එහිදී ගිණුම් සම්මත කරගැනීම පාලනාධිකාරියේ ප්රධාන අරමුණ වී තිබේ.
ශ්රී ලංකා ක්රිකට් පරිවර්තනීය කමිටුවේ සභාපති ලෙස එරාන් වික්රමරත්න මහතා පත් කර ඇති අතර, කුමාර් සංගක්කාර, රොෂාන් මහානාම සහ සිදත් වෙත්තමුණි වැනි ප්රවීණ ක්රීඩකයන් ද එම කමිටුවට ඇතුළත් වේ.
