ජනාධිපති අනුර කුමාර දිසානායක මහතාගේ ප්රධානත්වයෙන් ජනාධිපති ලේකම් කාර්යාලයේදී බලශක්ති අමාත්යාංශයේ 2026 අයවැය ව්යාපෘතිවල ප්රගතිය සහ 2027 අයවැය සඳහා වූ පූර්ව සාකච්ඡාව පැවැත්විණි.
දෙල්ෆ්ට්, අනලතිවු සහ නයිනතිවු දූපත්වල ක්රියාත්මක වන දෙමුහුන් පුනර්ජනනීය බලශක්ති පද්ධති (HRES) ව්යාපෘතියේ ප්රගතිය සමාලෝචනය කළ ජනාධිපතිවරයා, එම දූපත් ‘හරිත බලශක්ති දූපත්’ ලෙස සංවර්ධනය කිරීමට උපදෙස් ලබා දුන්නේය.
ආර්ථික අර්බුදය හේතුවෙන් අතරමග නතර වූ ජපාන ජාත්යන්තර සහයෝගිතා නියෝජිතායතනයේ (JICA) ආධාර යටතේ ක්රියාත්මක වූ බලශක්ති ව්යාපෘති යළි ආරම්භ කිරීම සහ ඒවා සඳහා 2027 අයවැයෙන් ප්රතිපාදන වෙන් කිරීම පිළිබඳවද අවධානය යොමු විය.
කෙරවලපිටිය සිට කොළඹ වරාය දක්වා දෙවන 220 kV භූගත විදුලි සම්ප්රේෂණ කේබල් පද්ධතිය, සම්පුර්–කප්පල්තුරෙයි විදුලි සම්ප්රේෂණ සංවර්ධන ව්යාපෘතිය, හබරණ–කප්පල්තුරෙයි නව විදුලි සම්ප්රේෂණ ව්යාපෘතිය, පරකඩුව 220 kV ජාල උපපොළෙහි STATCOM පද්ධතිය ස්ථාපනය කිරීම සහ වහල මත සවිකරන සූර්ය බලශක්ති ව්යාපෘතිය ඇතුළු ප්රධාන ව්යාපෘති රැසක ප්රගතිය ජනාධිපතිවරයා විසින් විමර්ශනය කරන ලදී.
ඛනිජ තෙල් අංශයට අදාළව ක්රියාත්මක වන ප්රධාන ව්යාපෘති 14ක ප්රගතිය සහ අනාගත මූල්ය අවශ්යතා ද මෙහිදී සමාලෝචනය විය. ඒ යටතේ කොලොන්නාව තෙල් ගබඩා සංකීර්ණයේ නව ගබඩා ටැංකි හයක් ඉදිකිරීම, මුතුරාජවෙල ඉන්ධන ගබඩා සංකීර්ණයේ නව ටැංකි දෙකක් ඉදිකිරීම සහ ගබඩා පහසුකම් පුළුල් කිරීම, කොලොන්නාව සංකීර්ණයේ ටැංකි ප්රතිසංස්කරණය සහ 07 වන කලාපයේ පිරවුම් පහසුකම් සංවර්ධනය කිරීම සිදු කෙරේ.
සියලුම ව්යාපෘති නියමිත කාලසීමාව තුළ සම්පූර්ණ කර මහජනතාවට එහි ප්රතිලාභ කඩිනමින් ලබා දීමේ වැදගත්කම ජනාධිපතිවරයා මෙහිදී අවධාරණය කළේය.
