ශ්රී ලංකා සංචාරක හා හෝටල් කළමනාකරණ ආයතනය (SLITHM) විසින් මෙරට සංචාරක ක්ෂේත්රය ගෝලීය ප්රමිතීන්ට අනුකූලව නව මාවතකට යොමු කිරීමේ අරමුණින් “ජාතික සංචාරක අර්ථකථනය කරන්නා” (National Tourist Interpreter) නමින් සුවිශේෂී පුහුණු වැඩසටහනක් හඳුන්වා දී ඇත. සාම්ප්රදායික සංචාරක මඟපෙන්වීමෙන් ඔබ්බට ගිය විද්යාත්මක සහ තිරසාර පදනමක් සහිත ප්රවේශයක් ලෙස මෙය සැලකේ.
මෙම නව පුහුණු ආකෘතිය හරහා ශ්රී ලංකාවේ පාරිසරික සහ සංස්කෘතික උරුමයන් පිළිබඳ ගැඹුරු සහ නිවැරදි අවබෝධයක් සංචාරකයින්ට ලබා දීමට අපේක්ෂා කරන අතර, එමගින් හුදු සංචාරයකින් ඔබ්බට ගිය වගකීම් සහගත ඉගෙනුම් අත්දැකීමක් අමුත්තන්ට හිමි වේ. විශේෂයෙන්ම සංවේදී පරිසර පද්ධති සහ සංස්කෘතික ස්ථාන ආරක්ෂා කරමින්, ඒවායේ වැදගත්කම විද්යාත්මකව අර්ථකථනය කිරීමට හැකි වෘත්තිකයන් පිරිසක් බිහි කිරීම මෙහි මූලික අරමුණයි.
මෙම වැඩසටහනේ විශේෂත්වය වන්නේ ක්ෂේත්රයේ පළපුරුදු විද්වතුන්ට සහ පර්යේෂකයන්ට මේ සඳහා අයදුම් කළ හැකි වීමයි. මාස තුනක කාලයක් පුරා ක්රියාත්මක වන මෙම පුහුණුව සඳහා ශ්රී ලංකා සංචාරක සංවර්ධන අධිකාරිය (SLTDA) විසින් නිකුත් කරනු ලබන විශේෂ බලපත්රයක් සහ ඩිජිටල් ලාංඡනයක් ද පිරිනැමීමට නියමිතය. මෙමගින් ශ්රී ලංකාවේ සංචාරක සන්නාමය ජාත්යන්තර මට්ටමින් තවදුරටත් ශක්තිමත් කිරීමටත්, රටට ඉහළ ආර්ථික වටිනාකමක් ලබා දීමටත් රජය අපේක්ෂා කරයි.
