ශ්රී ලංකාවේ පුරෝගාමී Internet Protocol Television (IPTV) සේවාවක් මෙන්ම ප්රමුඛතම ඩිජිටල් විනෝදාස්වාද වේදිකාවක් වන SLT-MOBITEL PEOTV, ජාත්යන්තර පාපන්දු සංගමය (FIFA) සමඟ සුවිශේෂී ගිවිසුමකට එළඹෙමින් 2026 FIFA ලෝක පාපන්දු කුසලාන තරගාවලියේ ශ්රී ලංකාවේ නිල මාධ්ය විකාශන අයිතිය (Official Media Rights) සාර්ථකව අත්පත් කරගෙන තිබේ. මෙය ශ්රී ලාංකීය ක්රීඩා විකාශන ක්ෂේත්රයේ සනිටුහන් වූ දැවැන්ත මෙන්ම ඓතිහාසික සන්ධිස්ථානයක් ලෙස සැලකේ.
මෙම නිල අයිතිය හිමිවීමත් සමඟ, ලෝකයේ දැවැන්තම පාපන්දු සැණකෙළියේ සියලුම තරග දේශීය ක්රීඩා ලෝලීන් වෙත සමීප කිරීමට SLT-MOBITEL කටයුතු සූදානම් කර ඇත. ඒ අනුව රට පුරා සිටින ප්රේක්ෂකයන්ට PEOTV, PEO Mobile යෙදුම (App) සහ එහි සෙසු ඩිජිටල් වේදිකාවන් ඔස්සේ තරගාවලියේ උණුසුම සජීවීව අත්විඳිය හැකිය. ලෝකයේ ප්රමුඛතම ක්රීඩා ඉසව් උසස්ම තාක්ෂණයෙන් යුතුව ශ්රී ලාංකිකයන් වෙත ගෙන ඒමට SLT-MOBITEL දරන අඛණ්ඩ උත්සාහයේ සුවිශේෂී ජයග්රහණයක් වන මෙම විකාශනය හරහා, තරගාවලියේ සියලුම තරග True HD තාක්ෂණයෙන් යුතුව නැරඹීමට අවස්ථාව හිමිවේ. නිවසේ විසිත්ත කාමරයේ සිට මෙන්ම ගමන් බිමන් යන අතරතුරදී වුවද PEO Mobile සහ ඩිජිටල් මාධ්ය ඔස්සේ ඉතා පහසුවෙන් තරග නැරඹීමට හැකිවීම පාපන්දු ලෝලීන්ට ලැබෙන සුවිශේෂී වරප්රසාදයකි.
මෙවර 2026 FIFA ලෝක කුසලාන තරගාවලිය එළඹෙන ජුනි මස 12 වන දින නිල වශයෙන් ආරම්භ වී ජූලි මස 20 වන දින දක්වා අති උත්කර්ෂවත් අන්දමින් පැවැත්වීමට නියමිතය. ඉතිහාසයේ ප්රථම වතාවට රටවල් 48 ක කණ්ඩායම් සහභාගී වන මෙම මහා තරගාවලිය සමස්ත තරග 104 කින් සමන්විත වන අතර, මෙවර සත්කාරකත්වය කැනඩාව, මෙක්සිකෝව සහ ඇමරිකා එක්සත් ජනපදය යන රාජ්යයන් ත්රිත්වය විසින් ඒකාබද්ධව දරනු ලබයි.
