මෑතකදී සමාජ මාධ්ය ඔස්සේ කුඩා දරුවන්ගේ විවිධ ඉදිරිපත් කිරීම් සහ වීඩියෝ බහුලව හුවමාරු වන ප්රවණතාවක් දක්නට ලැබේ. දරුවන්ගේ දක්ෂතා පෙන්වීමේ අරමුණින් දෙමාපියන් සහ සමීප ඥාතීන් විසින් පවත්වාගෙන යන ගිණුම් හරහා මෙම වීඩියෝ පල කරනු ලබන අතර, ඇතැම් වීඩියෝ සඳහා විශාල නැරඹුම් වාර සහ ප්රතිචාර හිමිව ඇත.
දෙමාපියන් පවසන පරිදි, දරුවන්ගේ හැකියාවන් සඳහා අවස්ථාවක් ලබා දීමේ අරමුණින් මෙම වීඩියෝ සමාජ මාධ්ය වෙත මුදාහරිනු ලබයි. ඇතැම් දරුවන්ට එමඟින් මාධ්ය හැදෑරීමට අවස්ථා ලැබී තිබුණද, දරුවන්ට එල්ල වන සමච්චල් සහ සෘණාත්මක ප්රතිචාර සම්බන්ධයෙන් දෙමාපියන් කලකිරීමට පත්ව ඇති බවද සඳහන් වේ.
ශ්රී ලංකා පරිගණක හදිසි ප්රතිචාර සංසදයේ තොරතුරු තාක්ෂණ ඉංජිනේරු තිනුරි තිසේරා පෙන්වා දෙන පරිදි, දරුවන්ගේ පින්තූර සහ වීඩියෝ AI තාක්ෂණය භාවිතයෙන් වැරදි සහගත ලෙස යොදා ගැනීමේ අවදානමක් පවතී. ඩීප් ෆේක් වැනි තාක්ෂණයන් හරහා නිරුවත් දර්ශන නිර්මාණය කරමින් ඔන්ලයින් හිරිහැරවලට හෝ බුලි කිරීමට ඒවා භාවිත කළ හැකිය. මීට අමතරව, දරුවන්ගේ කටහඬ සහ රූප භාවිත කරමින් දෙමාපියන්ව විවිධ වංචාවලට හසු කර ගැනීමට ඉඩ ඇති අතර, කුඩා කාලයේදීම ඩිජිටල් තිරවලට ඇබ්බැහි වීමෙන් දරුවන්ගේ අධ්යාපන කටයුතුවලට සහ අනාගතයට බලපෑම් ඇති විය හැක.
පොලිස් කාන්තා හා ළමා කාර්යාංශය පවසන්නේ දෙමාපියන් දෙදෙනාගේම කැමැත්ත ඇතිව, බලහත්කරීත්වයකින් තොරව සහ අපරාධමය ස්වභාවයක් නොමැති නම් එවැනි වීඩියෝ පල කිරීම සම්බන්ධයෙන් විශේෂ නීතිමය පසුබිමක් නොමැති වුවද, මෙහි අවදානමක් පවතින බව දෙමාපියන් මතක තබාගත යුතු බවයි. ජාතික ළමා ආරක්ෂක අධිකාරිය සඳහන් කරන්නේ යහපත් චේතනාවකින් වුවද දරුවන් සමාජ මාධ්යවලට නිරාවරණය කිරීමේදී සැලකිලිමත් විය යුතු බවත්, ඩිජිටල් අවකාශයට මුදා හරින දේවල් සම්පූර්ණයෙන් මකා දැමීම ඉතා අපහසු බැවින් අනාගතයේදී ඒවා දරුවාට හානිකර වීමට ඉඩ ඇති බවත්ය. සෑම දෙයක්ම නීතියෙන් පාලනය කළ නොහැකි නිසා දෙමාපියන් සෑම විටම දුරදිග සිතා බලා කටයුතු කළ යුතුය.
