ජපානයේ සොෆ්ට්බෑන්ක් සමූහය (SoftBank Group) විසින් ඉදිරි වසර පහ තුළ ප්රංශයේ කෘත්රිම බුද්ධි (AI) යටිතල පහසුකම් සංවර්ධනය කිරීම සඳහා යුරෝ බිලියන 45ක දැවැන්ත ආයෝජනයක් සිදු කිරීමට තීරණය කර තිබේ. සොෆ්ට්බෑන්ක් නිර්මාතෘ මසයෝෂි සොන් මහතා පවසන පරිදි, සමස්තයක් ලෙස ප්රංශය තුළ සිදු කිරීමට අපේක්ෂිත මෙම ආයෝජන වටිනාකම යුරෝ බිලියන 75ක් දක්වා වර්ධනය වනු ඇත.
මෙම ව්යාපෘතිය ප්රංශයේ උතුරු ප්රදේශයේ පිහිටි Hauts-de-France කලාපය කේන්ද්ර කරගනිමින් ක්රියාත්මක වීමට නියමිතය. ඒ අනුව, ලී බොස්කෙල් (Le Bosquel) සහ ඩන්කර්ක් (Dunkirk) යන ප්රදේශවල නවීන දත්ත මධ්යස්ථාන දෙකක් ස්ථාපිත කිරීමට නියමිත අතර, ඒවා පිළිවෙළින් 2028 සහ 2031 වසරවලදී මෙහෙයුම් ආරම්භ කරනු ඇත. මෙම මධ්යස්ථාන මගින් ගිගාවොට් 5කට අධික පරිගණක ධාරිතාවක් ලබා දීමට අපේක්ෂා කෙරේ.
ප්රංශය තෝරා ගැනීමට හේතුව පැහැදිලි කරමින් මසයෝෂි සොන් මහතා සඳහන් කළේ, ප්රංශය බලශක්ති නිෂ්පාදනය සහ අපනයනය කරන රටක් වීම AI යටිතල පහසුකම් සඳහා ඉතා තීරණාත්මක සාධකයක් බවයි. AI තාක්ෂණය සඳහා අධික බලශක්තියක් අවශ්ය වන පසුබිමක, ප්රංශයේ පවතින බලශක්ති හැකියාව මෙම ආයෝජනයට මූලික වී තිබේ.
මෙම ආයෝජන සැලැස්ම පිළිබඳ නිල නිවේදනය සඳුදා පැවැත්වීමට නියමිත වාර්ෂික ‘Choose France’ ව්යාපාරික සමුළුවේදී සිදු කිරීමට නියමිතය. ප්රංශ ජනාධිපති එමානුවෙල් මැක්රොන් විසින් 2018 වසරේ ආරම්භ කරන ලද මෙම සමුළුව මගින් විදේශීය ආයෝජකයින් ආකර්ෂණය කර ගැනීම අරමුණු කරයි. සොෆ්ට්බෑන්ක් සමාගම දැනටමත් OpenAI සමාගම තුළ ඇමෙරිකානු ඩොලර් බිලියන 30කට අධික ආයෝජනයක් සිදු කරමින් එම සමාගමේ 11%ක කොටස් හිමි කරගෙන සිටින අතර, මෙම නව ප්රංශ ආයෝජනය ඔවුන්ගේ ගෝලීය AI ව්යාප්තියේ තවත් වැදගත් පියවරක් වනු ඇත.
