විශේෂ වෙළඳ භාණ්ඩ බදු පනත සහ ආනයන අපනයන පාලන පනත යටතේ නව නියාමනයන් හඳුන්වා දෙමින් චම්පික හෙට්ටිආරච්චි මහතා ප්රකාශ කළේ, දේශීය ගොවියා සහ නිෂ්පාදකයා ආරක්ෂා කිරීම රජයේ ප්රමුඛතම අරමුණ බවයි. දේශීය බඩඉරිඟු ගොවියාට විදේශීය ආනයනකරුවන් සමඟ තරඟ කිරීමට හැකි වන පරිදි ආනයනික බඩඉරිඟු සඳහා රුපියල් 25ක අතිරේක බද්දක් පනවා මිල ස්ථාවර කිරීමට පියවර ගෙන ඇති බව ඔහු පෙන්වා දුන්නේය.
ඖෂධ නිෂ්පාදනය සඳහා සහනයක් ලෙස, සෞඛ්ය අමාත්යාංශයේ අනුමැතිය මත ආනයනය කරන ලුණු සඳහා වන බද්ද රුපියල් 10 දක්වා අඩු කර ඇති අතර, පොල්තෙල් සිඳීම සඳහා ආනයනය කරන පොල් මද සඳහා ද සහනදායී බදු අනුපාතයක් පවත්වාගෙන යන බව ඔහු සඳහන් කළේය.
පාරිසරික ආරක්ෂාව සම්බන්ධයෙන් අදහස් දැක්වූ හෙට්ටිආරච්චි මහතා අවධාරණය කළේ මොන්ට්රියල් සම්මුතියට අනුව ඕසෝන් ස්ථරයට හානි කරන HCFC රසායනික සහිත උපකරණ ආනයනය 2026 ජූනි මස සිට සීමා කර 2030 වන විට සම්පූර්ණයෙන්ම නතර කිරීමට රජය කටයුතු කරන බවයි.
බදු පද්ධතිය සරල කිරීමේ අරමුණින් මූල්ය සේවා සඳහා පැවති වැට් (VAT) සහ එස්.එස්.සී.එල්. (SSCL) බදු වර්ග දෙක ඒකාබද්ධ කර 26.5%ක තනි බදු අනුපාතයක් හඳුන්වා දුන් බවත්, මෙය බදු වැඩි කිරීමක් නොව ලිපිලේඛන කටයුතු අවම කර ව්යාපාරිකයන්ට සහනයක් සැලසීමක් බවත් ඔහු පැහැදිලි කළේය.
තවද, දේශීය සිනමා කර්මාන්තයට සහනයක් ලෙස චිත්රපට සඳහා අය කළ විනෝද බද්ද වැට් බද්දෙන් ඉවත් කිරීමට ද පියවර ගෙන ඇති අතර, ජූලි මස සිට විදේශීය ඩිජිටල් වේදිකා (Digital Platforms) හරහා සැපයෙන සේවාවන් ද දේශීය බදු ජාලයට ඇතුළත් කරන බව ඔහු වැඩිදුරටත් ප්රකාශ කළේය.
