2024 වසරේ පවත්වන ලද ජන හා නිවාස සංගණනයේ අවසන් වාර්තාවට අනුව ශ්රී ලංකාවේ සමස්ත ජනගහනය දෙකෝටි දාහත් ලක්ෂ අසූ එක්දහස් අටසියයක් (21,781,800) දක්වා වර්ධනය වී ඇති අතර මෙරට සෑම දිස්ත්රික්කයකම පිරිමි ජනගහනයට වඩා කාන්තා ජනගහනය ඉහළ අගයක් ගන්නා බව අනාවරණය වී තිබේ. ජන ලේඛන හා සංඛ්යාලේඛන දෙපාර්තමේන්තුවේ අධ්යක්ෂ ජනරාල් කේ.එම්.ඩී.එස්.ඩී. කරුණාරත්න මහතා විසින් මෙම වාර්තාව ඊයේ ජනාධිපති ලේකම් කාර්යාලයේදී ජනාධිපති අනුර කුමාර දිසානායක මහතා වෙත නිල වශයෙන් බාර දෙන ලදී.
වාර්තාවට අනුව 2012 වසරේ පැවති සංගණනයට සාපේක්ෂව මෙරට ජනගහනය 1,422,361 කින් ඉහළ ගොස් ඇති අතර සමස්ත ජනගහනයෙන් 51.7% ක් එනම් 11,269,456 ක් කාන්තාවන් වන අතර පිරිමින් වාර්තා වන්නේ 48.3% ක් එනම් 10,512,344 ක් වශයෙනි. ඒ අනුව පිරිමින්ට වඩා කාන්තාවන් 757,112 ක් මෙරට වෙසෙන අතර ලිංගික අනුපාතය කාන්තාවන් 100 කට පිරිමින් 93.3 ක් දක්වා සුළු වශයෙන් පහත වැටී තිබේ.
දිස්ත්රික් මට්ටමින් සලකා බැලීමේදී මෙතෙක් මෙරට වැඩිම ජනගහනයක් වාසය කළ කොළඹ දිස්ත්රික්කය දෙවැනි ස්ථානයට පත් කරමින් ගම්පහ දිස්ත්රික්කය මෙරට වැඩිම ජනගහනය සහිත දිස්ත්රික්කය ලෙස ප්රථම ස්ථානයට පත්ව ඇත්තේ 2,436,142 ක ජනගහනයක් වාර්තා කරමිනි. කොළඹ දිස්ත්රික්කය 2,375,415 කින් දෙවැනි ස්ථානයත්, කුරුණෑගල දිස්ත්රික්කය 1,768,156 කින් තෙවැනි ස්ථානයත් ලබාගෙන ඇති අතර මෙරට අඩුම ජනගහනයක් වාර්තා වන දිස්ත්රික්කය ලෙස මුලතිව් දිස්ත්රික්කය (122,619) හඳුනාගෙන ඇත.
වයස් කාණ්ඩ අනුව ජනගහනය බෙදී යාම සලකා බැලීමේදී අවුරුදු 15 ත් 59 ත් අතර ක්රියාකාරී ශ්රම බලකාය 13,353,837 ක් වන අතර අවුරුදු 14 ට අඩු දරුවන් 4,506,839 ක් සහ අවුරුදු 65 ට වැඩි පුද්ගලයින් 2,737,814 ක් මෙරට වෙසෙති. 2024 දෙසැම්බර් මස ඇරඹුණු මෙම 15 වන ජන සංගණනය ශ්රී ලංකාවේ දත්ත රැස් කිරීම සඳහා ටැබ්ලට් පරිගණක සහ ස්මාර්ට් ජංගම දුරකථන භාවිතා කළ ප්රථම අවස්ථාව ලෙස ද ඉතිහාසයට එක් වේ.
