ශ්‍රී ලංකා අපනයන සංවර්ධන මණ්ඩලය (EDB) විසින් සංවිධානය කරන ලද 26 වන අපනයනකරුවන්ගේ සංසදය කර්මාන්ත හා ව්‍යවසායකත්ව සංවර්ධන අමාත්‍ය සුනිල් හඳුන්නෙත්ති මහතාගේ ප්‍රධානත්වයෙන් ඊයේ (අගෝස්තු 19) එම මණ්ඩල පරිශ්‍රයේදී සාර්ථකව පැවැත්විණි. අපනයනකරුවන්ට තම ව්‍යාපාරික ගැටළු ප්‍රතිපත්ති සම්පාදකයින් වෙත සෘජුව ඉදිරිපත් කර ප්‍රායෝගික විසඳුම් ලබාගැනීම සඳහා මෙය වැදගත් වේදිකාවක් විය.
අපනයන ක්ෂේත්‍රයේ පවතින බාධා සරල කරමින් රටේ ආර්ථිකය ශක්තිමත් කිරීමට රජය උපරිම සහය ලබා දෙන බව අමාත්‍යවරයා සඳහන් කළේය. එමෙන්ම, අපනයනකරුවන්ගේ ගැටලු කොළඹට පමණක් සීමා නොවී, පළාත් මට්ටමින් විසඳීමට කටයුතු යොදා ඇත. රජයේ මූලික ඉලක්කය අපනයනකරුවන්ගේ සංඛ්‍යාවට වඩා අපනයන පරිමාව ඉහළ නැංවීමයි. ග්‍රාමීය නිෂ්පාදකයින්ට ජාත්‍යන්තර වෙළඳපොළට පිවිසීමට අවශ්‍ය තාක්ෂණය සහ පහසුකම් ලබා දීමටද පියවර ගැනේ.
ජාතික අපනයන සංවර්ධන සැලැස්මට අනුව 2030 වසර වන විට ඇමරිකානු ඩොලර් බිලියන 36ක අපනයන ආදායමක් ලබා ගැනීම රජයේ අපේක්ෂාවයි. 2025 වසරේදී ඩොලර් බිලියන 17.3ක වාර්තාගත අපනයන අගයක් අත්කර ගෙන ඇති අතර, 2026 වසර සඳහා ඩොලර් බිලියන 19ක ඉලක්කයක් හඹා යයි. මෙම අවස්ථාවට අමාත්‍යවරුන්, රාජ්‍ය නිලධාරීන්, අපනයන සංවර්ධන මණ්ඩලයේ සභාපති මංගල විජේසිංහ මහතා ඇතුළු වාණිජ මණ්ඩල නියෝජිතයන් සහ අපනයනකරුවන් රැසක් සහභාගී වූහ.
