ශ්රී ලංකා යුද හමුදාපති ලුතිනන් ජෙනරාල් ලසන්ත රුද්රිගු මහතාගේ සංකල්පයකට අනුව ක්රියාත්මක කෙරෙන “හුස්මෙන් හුස්මක් විරුතුරු සෙවණ” වැඩසටහන යටතේ පැළ සිටුවීමේ විශේෂ වැඩසටහනක් අම්පාර දිස්ත්රික්කයේ එරගම ප්රාදේශීය ලේකම් කොට්ඨාශයේ ඉරක්කාමම් වැව අසලදී පවත්වා තිබේ.
මෙම සමාරම්භක උත්සවය අම්පාර දිසාපති අනුපම මංගල වික්රමාරච්චි සහ ශ්රී ලංකා යුද හමුදාවේ 24 සේනාංකාධිපති මේජර් ජෙනරාල් දිලුප බංඩාර යන මහත්වරුන්ගේ ප්රධානත්වයෙන් පැවැත්විණි. සර්ව ආගමික වතාවත් පැවැත්වීමෙන් සහ මියගිය රණවිරුවන් සිහිකිරීම සඳහා විනාඩි දෙකක නිශ්ශබ්දතාවයක් පැවැත්වීමෙන් අනතුරුව උත්සවයේ කටයුතු ආරම්භ කෙරුණු අතර, චිරාගත සම්ප්රදායානුකූලව පොල්තෙල් පහන දැල්වීම ද මෙහිදී සිදු කෙරිණි. අනතුරුව අම්පාර දිසාපතිවරයා විසින් පැළයක් රෝපණය කරමින් මෙම වැඩසටහන නිල වශයෙන් ආරම්භ කරන ලදී.
මෙම අවස්ථාවට නාවික හමුදාවේ ගිනිකොණ දිග ආඥාපති නිමල් රණසිංහ, ශ්රී ලංකා ගුවන් හමුදාවේ අම්පාර අණදෙන නිළධාරි ගෘෘප් කපිතාන් ප්රභාත් ඇලෙක්සෙන්ඩර්, අම්පාර කොට්ඨාශ භාර ජ්යෙෂ්ඨ පොලිස් අධිකාරි ප්රියන්ත බංඩාර කස්තුරිආරච්චි මෙන්ම පොලිස් විශේෂ කාර්ය බලකායේ කලාප අණදෙන නිළධාරි පොලිස් අධිකාරි කේසර රත්නවිර යන උසස් නිලධාරීහු ද එක්වෙමින් රුක් රෝපණය සඳහා දායකත්වය දැක්වූහ. යුද්ධයේදී මියගිය තම පුතුන් වෙනුවෙන්, මෙම අවස්ථාවට සහභාගි වූ රණවිරු ඥාතීන් විසින් මෙම භූමියේ පැළ රෝපණය කිරීම විශේෂත්වයක් විය.
මෙම සුවිශේෂී රුක් රෝපණ වැඩසටහන ශ්රී ලංකා යුද හමුදාවේ 241 බල සේනාධිපති බ්රිගේඩියර් සුදත් දිසානායක සහ 24 සේනාංකයේ සිවිල් සම්බන්ධීකරණ නිලධාරි කර්නල් බන්දුල රත්නායක යන මහත්වරුන් විසින් සංවිධානය කර තිබුණි.
