ශ්රී ලංකාවේ 2024 ජන හා නිවාස සංගණනයට අනුව ශ්රී ලාංකිකයන් 672,249 දෙනකු තාවකාලිකව විදේශගතව සිටි බව ජනලේඛන හා සංඛ්යාලේඛන දෙපාර්තමේන්තුවේ අවසන් සංගණන වාර්තාවෙන් අනාවරණය වී තිබේ. එම පිරිසෙන් සියයට 86ක් රැකියා සඳහා විදේශගතව සිටි අතර තවත් සියයට 8ක් අධ්යාපන කටයුතු සඳහා විදේශගතව සිටි බව එම වාර්තාවේ සඳහන් වේ.
මෙම සංඛ්යාලේඛනවලට ඇතුළත් වන්නේ ශ්රී ලංකාවේ ගෘහයක සාමාජිකයන් වන, මාස හයකට වැඩි කාලයක් විදේශගතව සිටින හෝ එතරම් කාලයක් විදේශගතව සිටීමට අදහස් කරමින් පිටත්ව ගිය පුද්ගලයන්ය. ස්ථිර පදිංචිය සඳහා විදේශගත වූවන් මෙම කාණ්ඩයට ඇතුළත් නොවේ.
සංගණන වාර්තාව අනුව තාවකාලිකව විදේශගතව සිටි පුද්ගලයන්ගෙන් සියයට 61.3ක් පිරිමින් වන අතර සියයට 38.7ක් කාන්තාවන් වේ. වැඩිම තාවකාලික විදේශගත ජනගහනයක් වාර්තා වී ඇත්තේ ගම්පහ, කොළඹ සහ කුරුණෑගල දිස්ත්රික්කවලිනි. මෙම දත්ත 2024 වසරේ සංගණනයට අදාළ වන අතර 2026 වසරේ වත්මන් විදේශගත ජනගහනය නිරූපණය නොකරයි.
