ඇමරිකානු ඩොලරයේ අගය සීඝ්රයෙන් ඉහළ යාම පාලනය කිරීම සඳහා ශ්රී ලංකා මහ බැංකුව මැදිහත් වෙමින්, ඩොලරයට රුපියල් 330ක නිල නොවන පාලන මිලක් (Capped Price) පනවා ඇති බව ශ්රී ලංකා මානව හිමිකම් කේන්ද්රයේ විධායක අධ්යක්ෂ රජිත් කීර්ති තෙන්නකෝන් මහතා පවසයි.
නිවේදනයක් නිකුත් කරමින් ඔහු කියා සිටින්නේ, මහ බැංකු අධිපතිවරයා වාණිජ බැංකු ප්රධානීන් කැඳවා ඩොලරයේ අගය රුපියල් 329ත් 335ත් අතර පවත්වාගෙන යන ලෙස උපදෙස් දී ඇති බවයි. මෙය ජාත්යන්තර මූල්ය අරමුදලේ (IMF) ප්රතිපාදන උල්ලංඝණය කිරීමක් බව ද ඔහු පෙන්වා දෙයි. මීට අමතරව, ආනයනකරුවන්ට මුදල් මෙරටට ගෙන ඒමට තිබූ කාලය දින 90 සිට දින 30 දක්වා සීමා කර ඇති බව ද සඳහන් වේ.
මහ බැංකුව බැංකුවලින් ඩොලර් මිලදී ගැනීම සඳහා රුපියල් මැවීම (මුදල් අච්චු ගැසීම) නිසා පසුගිය මාස 15 තුළ මුදල් සැපයුම රුපියල් ට්රිලියන 2.1කින් ඉහළ ගොස් ඇතැයි චෝදනා කරන තෙන්නකෝන් මහතා, ජනාධිපති අනුර කුමාර දිසානායක මහතාගේ අත්සනින් යුත් නව නෝට්ටු නිසා සංසරණයේ පවතින ව්යවහාර මුදල් ප්රමාණය රුපියල් මිලියන 303,956කින් ඉහළ ගොස් ඇති බව ද පවසයි.
එලෙස මුදල් සැපයුම ඉහළ දැමුව ද රටේ විදේශ සංචිතවල කැපී පෙනෙන වර්ධනයක් සිදුව නොමැති බවත්, මධ්යම රජයේ නොපියවූ ණය ප්රමාණය 2025 වසර අවසානය වන විට රුපියල් බිලියන 29,994.69 දක්වා රුපියල් බිලියන 1,754.47කින් ඉහළ ගොස් ඇති බවත් එම නිවේදනයේ වැඩිදුරටත් සඳහන් වේ.
