2026 මාර්තු මාසය සඳහා වන ශ්රී ලංකා ගැනුම් කළමනාකරුවන්ගේ දර්ශකය (PMI) මගින් ඉදිකිරීම් ක්ෂේත්රයේ අඛණ්ඩ වර්ධනයක් පෙන්නුම් කරන බව ශ්රී ලංකා මහ බැංකුව පවසයි. පසුගිය මාසයට සාපේක්ෂව වර්ධන වේගය මඳක් අඩු වුවද, සමස්ත ක්රියාකාරකම් දර්ශකය දර්ශකාංක 57.1ක අගයක් වාර්තා කරමින් යහපත් මට්ටමක පවතී.
මැදපෙරදිග පවතින ගැටුම්කාරී තත්ත්වය හේතුවෙන් ඉන්ධන සහ අමුද්රව්ය හිඟය, පිරිවැය ඉහළ යාම සහ සැපයුම් දාමයන්හි සීමාවන් පැනනැගී ඇති බව සමීක්ෂණයට සහභාගී වූවන් ප්රකාශ කර ඇත. විශේෂයෙන්ම ප්රවාහන ප්රමාදයන් නිසා ඇණවුම් සැපයීමට සැපයුම්කරුවන්ට ගතවන කාලය සැලකිය යුතු ලෙස ඉහළ ගොස් තිබේ.
පවතින අභියෝග මධ්යයේ වුවද නව ඇණවුම් දර්ශකය වර්ධනය වී ඇති අතර, ඉදිකිරීම් ව්යාපෘති ප්රදානය කිරීම් ඉහළ මට්ටමක පවතී. සැලසුම් කළ පරිදි නව බඳවා ගැනීම් සහ තොග මිලදී ගැනීම් ද අඛණ්ඩව සිදු කෙරේ. බොහෝ සමාගම් ඉදිරියේදී මිල ඉහළ යනු ඇතැයි පවතින අපේක්ෂාව නිසා අමුද්රව්ය තොග රැස් කර ගැනීමට උත්සාහ කරන බව ද වාර්තා වේ.
ඉදිරි කාර්තුව සඳහා වන අපේක්ෂා දර්ශකය තවදුරටත් කඩඉම් මට්ටමට වඩා ඉහළින් පවතී. කෙසේ වෙතත්, මැදපෙරදිග නොසන්සුන්කාරී වාතාවරණයෙන් මතුව ඇති අවිනිශ්චිතතාවය හේතුවෙන් එම අපේක්ෂාවන්හි යම් අඩුවීමක් දක්නට ලැබෙන බව ද මහ බැංකු වාර්තා පෙන්වා දෙයි.
