ලංකා ඛනිජ තෙල් නීතිගත සංස්ථාව (CPC) විසින් මෙතෙක් කිසිදු ඉන්ධන මිල සංශෝධන යෝජනාවක් ඉදිරිපත් කර නොමැති බව කැබිනට් ප්රකාශක, අමාත්ය වෛද්ය නලින්ද ජයතිස්ස මහතා පවසයි. අද (15) පැවැති කැබිනට් තීරණ දැනුම්දීමේ මාධ්ය හමුවේදී ඔහු මේ බව සඳහන් කළේය.
රට තුළ දැනට පවතින්නේ මීට පෙර ඇණවුම් කරන ලද ඉන්ධන තොග බවත්, මිල සංශෝධනයක් සම්බන්ධයෙන් මේ වන තෙක් කිසිදු සාකච්ඡාවක් ආරම්භ කර නොමැති බවත් අමාත්යවරයා පැහැදිලි කළේය. පවතින මිල ගණන් යටතේ ඉන්ධන අලෙවි කිරීමට සමහර බෙදාහරින්නන් යම් යම් අපහසුතාවන්ට මුහුණ දී සිටින බව පිළිගත් ඔහු, එම බර සැහැල්ලු කිරීම සඳහා රජය මාස තුනක කාලයක් සඳහා සහන ලබා දීමට පියවර ගත් බවද සිහිපත් කළේය. ඒ සඳහා මහා භාණ්ඩාගාරයෙන් රුපියල් බිලියන 57 ක මුදලක් වෙන් කර තිබේ.
ඉන්ධන මිල සම්බන්ධයෙන් අනාගතයේදී ගන්නා තීරණ ගෝලීය මිල වෙනස්වීම් මත රඳා පවතින බවත්, ජාත්යන්තර ඉන්ධන මිල තවදුරටත් ඉහළ යන්නේද යන්න තක්සේරු කිරීමෙන් පසු පමණක් රජය ඒ සම්බන්ධයෙන් කටයුතු කරන බවත් ජයතිස්ස මහතා වැඩිදුරටත් කියා සිටියේය.
