මුද්‍රණ යන්ත්‍ර සහ හිස් කාඩ්පත් හිඟයක් හේතුවෙන් රියදුරු බලපත්‍ර 673,000ක් මුද්‍රණය කිරීම නතර කර ඇති බව මෝටර් රථ ප්‍රවාහන කොමසාරිස් ජනරාල් එයාර් වයිස් මාර්ෂල් තුෂාර ප්‍රනාන්දු මහතා පවසයි. ප්‍රවාහන, මහාමාර්ග සහ නගර සංවර්ධන අමාත්‍යාංශයේ උපදේශක කාරක සභාව අමතමින් ඔහු මේ බව සඳහන් කර තිබේ.
දැනට පවතින හිස් කාඩ්පත් මිලියනයක තොගය ලබන ජනවාරි මාසය වන විට අවසන් වනු ඇතැයි අපේක්ෂා කරන බව ද ඔහු ප්‍රකාශ කළේය. ඒ අනුව, රියදුරු බලපත්‍ර මුද්‍රණ කටයුතු අඛණ්ඩව පවත්වාගෙන යාම සඳහා කාඩ්පත් සැපයුම සම්බන්ධයෙන් අවධානය යොමු වී තිබේ.
නව සැපයුම් ගිවිසුම යටතේ කාඩ්පත් මිලියන දෙකක පළමු තොගය ලබන වසරේ මාර්තු මස අවසානය වන විට ලැබීමට නියමිත බව කොමසාරිස් ජනරාල්වරයා වැඩිදුරටත් සඳහන් කළේය.
