2026 වසරේ පළමු කාර්තුව තුළ ශ්රී ලංකාව 5.1%ක ධනාත්මක ආර්ථික වර්ධන වේගයක් අත්කරගෙන ඇති බව ජන හා සංඛ්යා ලේඛන දෙපාර්තමේන්තුවේ නවතම වාර්තාවක් පෙන්වා දෙයි. ස්ථාවර මිල යටතේ මෙරට දළ දේශීය නිෂ්පාදිතය (GDP) පසුගිය වසරේ පළමු කාර්තුවේ පැවති රුපියල් මිලියන 3,476,664 සිට, මෙම වසරේ පළමු කාර්තුවේදී රුපියල් මිලියන 3,652,503 දක්වා ඉහළ ගොස් ඇත. මෙම වර්ධනයට ප්රධාන ආර්ථික අංශවල දායකත්වය සැලකීමේදී කෘෂිකාර්මික අංශය 1.1%කින් ද, කර්මාන්ත අංශය 7.2%කින් ද, සේවා අංශය 3.4%කින් ද ධනාත්මකව වර්ධනය වී තිබේ. පවත්නා මිල ගණන් යටතේ මෙරට දළ දේශීය නිෂ්පාදිතයට කෘෂිකර්මාන්තය 7.3%, කර්මාන්ත අංශය 27.2% සහ සේවා අංශය 54.2%ක දායකත්වයක් ලබා දී ඇති අතර, භාණ්ඩ හා සේවා මත අයකරන බදු දළ දේශීය නිෂ්පාදිතයට 11.3%ක දායකත්වයක් සපයා ඇත.කෙසේ වෙතත්, මැද පෙරදිග පවතින අර්බුදකාරී තත්ත්වයන් හේතුවෙන් මෙම වසරේ ආර්ථික වර්ධන වේගය පසුගිය වසරට සාපේක්ෂව මන්දගාමී විය හැකි බව ජාත්යන්තර මූල්ය අරමුදල (IMF) පුරෝකථනය කරයි. එම පුරෝකථනයන්ට අනුව, මෙම වසරේ ආර්ථික වර්ධන වේගය 3%ක් ලෙසත්, ලබන වසරේ එය 3.2% දක්වා ඉහළ යනු ඇති බවත්, 2028 වසර වන විට එය 3.1%ක් දක්වා මට්ටම් විය හැකි බවත් පෙන්වා දී ඇත.
