එල් නිනෝ තර්ජනය සහ ඉහළ යන නිෂ්පාදන පිරිවැය හමුවේ ශ්රී ලංකාවේ ආහාර සුරක්ෂිතතාව සහ දේශගුණික පද්ධති දැඩි අවදානමක: එක්සත් ජාතීන්ගේ සංවිධානයෙන් හදිසි අනතුරු ඇඟවීමක්
එළඹෙන මහ කන්නයේ වගා කටයුතු ආරම්භ වීමට නියමිතව තිබියදී, බලවත් එල් නිනෝ තත්ත්වයන්, අහිතකර දේශගුණික විපර්යාස සහ ආර්ථික පීඩනයන්හි ඒකාබද්ධ බලපෑම හේතුවෙන් ශ්රී ලංකාව දැඩි අවදානම් සහගත තත්ත්වයකට මුහුණ දී සිටින බව එක්සත් ජාතීන්ගේ නවතම වාර්තාවක් මඟින් පෙන්වා දී තිබේ. ආසියා-පැසිෆික් කලාපීය තක්සේරුව යටතේ ශ්රී ලංකාව “ඉහළ කනස්සල්ලට කරුණක්” පවතින රටක් ලෙස නම් කර ඇති අතර, දෙවන අන්තර් මෝසම් වර්ෂාවත් සමඟ ඔක්තෝබර් මාසයේ සිට සාමාන්යයට වඩා වැඩි වර්ෂාපතනයක් ලැබීමේ හැකියාව පවතින බව එමඟින් තවදුරටත් අනාවරණය කර ඇත.
මෙම අතිරේක වර්ෂාපතනය මඟින් රටේ ජලාශ නැවත පිරවීම සඳහා යම් රුකුලක් ලැබුණද, ඉදිරි මහ වගා කාලය තුළ අපේක්ෂිත අධික වර්ෂාපතනය හේතුවෙන් හදිසි ගංවතුර තත්ත්වයන්, බිම් ජලයෙන් යටවීම් සහ කෘෂිකාර්මික කටයුතු දැඩි ලෙස ප්රමාද වීමේ අවදානමක් මතුව තිබේ. ඊට අමතරව, ගෝලීය වෙළඳපොළේ බලපෑම් සහ මැදපෙරදිග අර්බුදය හමුවේ ඉන්ධන මිල ඉහළ යෑම දේශීය ආහාර නිෂ්පාදන ක්රියාවලියට දැඩි ලෙස බලපා ඇති අතර, ඩීසල් සහ පෙට්රල් මිල ගණන් අර්බුදයට පෙර මට්ටමට වඩා පිළිවෙළින් සියයට 44 කින් සහ 41 කින් ඉහළ ගොස් තිබීම සමස්ත සැපයුම් දාමයටම අභියෝගයක් වී ඇත.
ආහාර හා කෘෂිකර්ම සංවිධානය (FAO), ලෝක ආහාර වැඩසටහන (WFP) සහ ලෝක කාලගුණ විද්යා සංවිධානය (WMO) ඇතුළු ප්රමුඛ පෙළේ එක්සත් ජාතීන්ගේ මානුෂීය ආයතන එකතුවෙන් සකස් කරන ලද මෙම වාර්තාව මඟින්, ශ්රී ලංකාව තවදුරටත් ආනයනික පොහොර සහ ජාත්යන්තර තිරිඟු මිල ඉහළ යෑමේ අවදානමට නිරාවරණය වී ඇති බව අවධාරණය කර සිටියි. එබැවින්, ඉදිරි කාලය තුළ ඇතිවිය හැකි ආහාර අර්බුද සහ කෘෂිකාර්මික පසුබෑම වැළැක්වීම සඳහා ජාතික මට්ටමින් කඩිනම් සහ පුළුල් ආපදා අවම කිරීමේ සූදානමක් ක්රියාත්මක කිරීම අත්යවශ්ය වන අතර, එසේ නොවුනහොත් එය රටේ ආර්ථික ස්ථාවරත්වයට මෙන්ම මහජන ජීවිතවලට දැඩි බලපෑමක් එල්ල කරනු ඇත.
