ශ්රී ලංකා බලශක්ති ඉතිහාසයේ නව පිටුවක් පෙරළමින්, මෙරට පළමු වාණිජ මට්ටමේ බැටරි බලශක්ති ගබඩා පද්ධතියේ (Battery Energy Storage System – BESS) පළමු මෙගාවොට් 20 ක ධාරිතාව සහිත බැටරි පද්ධති කාණ්ඩය ඊයේ (23) කොළඹ වරායෙන් සාර්ථකව මුදාහැර තිබේ. රුපියල් බිලියන 40 ක දැවැන්ත ආයෝජනයකින් ක්රියාත්මක වන මෙම ජාතික ව්යාපෘතිය, ශ්රී ලංකාවේ බලශක්ති ක්ෂේත්රයේ සිදුවන විශාලතම තාක්ෂණික හැරවුම් ලක්ෂ්යයක් ලෙස සැලකේ.
මෙම ව්යාපෘතියේ ඉදිරි ක්රියාමාර්ග සහ ව්යාප්තිය මෙසේය:
පළමු අදියර සහ කලාපීය ව්යාප්තිය:
මෙම ව්යාපෘතිය තනි කලාපයකට සීමා නොවී ජාතික විදුලිබල පද්ධතිය පුරා උපායමාර්ගිකව විහිදී යන පුළුල් ජාලයක් ලෙස ක්රියාත්මක වේ. පළමු අදියර යටතේ මෙගාවොට් 10 ක ධාරිතාව බැගින් වූ උප-ව්යාපෘති 16 ක් දිවයින පුරා ප්රධාන විදුලි උපපොළවල් (Grid Substations) කේන්ද්ර කරගනිමින් ස්ථාපිත කෙරේ. ඒ අනුව, වරායෙන් මුදාහැරුණු මුල්ම බැටරි පද්ධති කාණ්ඩය ඉදිරි මාස කිහිපය තුළ නව ගාල්ල (New Galle) සහ මාතර උපපොළවල් වෙත සම්බන්ධ කිරීමට නියමිතය.
මීට අමතරව බස්නාහිර සහ දකුණ (පන්නිපිටිය, හොරණ, කොස්ගම, පානදුර, අම්බලන්ගොඩ, හම්බන්තොට), මධ්යම, වයඹ සහ සබරගමුව (කිරිබත්කුඹුර, කුරුණෑගල, බෝලවත්ත, මාදම්පේ, පන්නල), උතුර සහ නැගෙනහිර (චුන්නාකම්, කිලිනොච්චි, අම්පාර) මෙන්ම ඌව සහ උතුරු මැද (මහියංගනය, මොනරාගල) යන ප්රධාන කලාපීය උපපොළවල් වෙත ද මෙම තාක්ෂණය ව්යාප්ත කිරීමට කටයුතු යොදා ඇත.
දෙවන සහ තෙවන අදියරයන්:
ව්යාපෘතිය තවදුරටත් පුළුල් කරමින්, දෙවන අදියර යටතේ තවත් ග්රිඩ් උපපොළවල් 19 ක් ආවරණය වන පරිදි මෙගාවොට් 250 ක ධාරිතාවක් එකතු කිරීමට සැලසුම් කර ඇත. එමෙන්ම, තෙවන අදියර යටතේ දැනට ක්රියාත්මක පොළොව මත සවිකර ඇති සෝලා (Solar) පද්ධතීන් සඳහා මෙගාවොට් 50 ක බැටරි ගබඩා පද්ධති ඇති කිරීමට නියමිතය. මේ සඳහා අවශ්ය මිලගණන් කැඳවීම් ඉදිරි සති කිහිපය තුළ සිදු කිරීමට කටයුතු සූදානම් කර ඇති බව ද වාර්තා වේ.
