ලෝකයට බලපෑම් එල්ල කර ඇති එල්නිනෝ තත්ත්වය සහ මැදපෙරදිග යුදමය වාතාවරණය හේතුවෙන් ආනයනික අත්යවශ්ය ආහාර ද්රව්යවල මිල ඉදිරියේදී සියයට 20 ත් 25 ත් අතර අගයකින් ඉහළ යෑමේ දැඩි අවදානමක් පවතින බව අත්යවශ්ය ආහාර ද්රව්ය ආනයනකරුවන්ගේ සංගමය අනතුරු අඟවා තිබේ. දැනටමත් පසුගිය දින කිහිපය තුළ ආනයනික සීනි කිලෝවක මිල රුපියල් 40කින් පමණ ඉහළ ගොස් ඇති මෙම පසුබිමක, ගෝලීය මට්ටමේ බලපෑම් දේශීය වෙළෙඳපොළ කෙරෙහි සෘජුවම බලපාමින් පවතී.
මේ අතර දැඩි වියළි කාලගුණය හේතුවෙන් අම්පාර, මඩකලපුව, මොණරාගල, පොළොන්නරුව සහ රත්නපුර යන දිස්ත්රික්කවල ප්රාදේශීය ලේකම් කොට්ඨාස 19ක පවුල් 23,377කට අධික සංඛ්යාවක පුද්ගලයින් 73,214ක් පමණ උග්ර පානීය ජල හිඟයකින් දැඩි පීඩාවට පත්ව සිටිති. ආපදා කළමනාකරණ මධ්යස්ථානය පෙන්වා දෙන්නේ ඉන් පවුල් 22,987ක පුද්ගලයින් 71,893ක් සඳහා මේ වන විටත් පානීය ජලය බෙදා හැරීමේ සහන වැඩපිළිවෙළ ක්රියාත්මක කර ඇති බවයි.
කාලගුණ විද්යා දෙපාර්තමේන්තුව සඳහන් කරන පරිදි නැගෙනහිර පළාත, යාපනය, කිලිනොච්චිය, වව්නියාව, මුලතිව්, පොළොන්නරුව සහ මොණරාගල යන දිස්ත්රික්කවල උෂ්ණත්වය සෙල්සියස් අංශක 39 ත් 45 ත් අතර අගයක් ගනිමින් මිනිස් සිරුරට දැනෙන උණුසුම අවධානය යොමු කළ යුතු මට්ටමක පවතී. අනුරාධපුරයේ හුරුළුවැව ඇතුළු ප්රධාන වාරි ජලාශවල ජල ධාරිතාව පහළ යෑම, කුඩා ජල මාර්ග සිඳී යාමෙන් මත්ස්යයන් මිය යෑම මෙන්ම කුඹල් කර්මාන්තය වැනි සාම්ප්රදායික ජීවිකාෝපායන් බිඳවැටීම හේතුවෙන් දේශීය ජනජීවිතය සහ ග්රාමීය ආර්ථිකය දැඩි අර්බුදයකට මුහුණ දී සිටියි.
