සිංහල හා දෙමළ අලුත් අවුරුදු උත්සව සමය තුළ මහජන සෞඛ්යය තහවුරු කිරීම වෙනුවෙන් දිවයින පුරා ක්රියාත්මක කළ විශේෂ ආහාර වැටලීම් මාලාවකදී ආයතන 1,109 කට එරෙහිව නඩු පැවරීමට පියවර ගත් බව ශ්රී ලංකා මහජන සෞඛ්ය පරීක්ෂකවරුන්ගේ සංගමයේ සභාපති කේ.ඒ.පී. බොරලැස්ස මහතා නිවේදනය කරයි. අප්රේල් මස 01 වනදා සිට ආරම්භ වූ මෙම විශේෂ මෙහෙයුම යටතේ දිවයින පුරා මහජන සෞඛ්ය පරීක්ෂකවරුන් 2,300 කට අධික පිරිසක් ආහාර සුරක්ෂිතතාව පරීක්ෂා කිරීම සඳහා යොදවා තිබේ.
අප්රේල් මස 16 වනදා දක්වා ලබාගත් දත්තයන්ට අනුව, මහජන සෞඛ්ය පරීක්ෂකවරුන් විසින් දිවයින පුරා ආයතන 19,537 ක් සෝදිසියට ලක් කර ඇත. එහිදී සිදු කළ ආහාර වැටලීම් 1,963 කදී මිනිස් පරිභෝජනයට නුසුදුසු ආහාර අත්අඩංගුවට ගැනීම් 4,211 ක් සිදු කර ඇති අතර, ඉන් ආහාර සාම්පල 2,954 ක් එම ස්ථානයේදීම විනාශ කිරීමට පියවර ගෙන තිබේ. සෞඛ්යාරක්ෂිත ක්රමවේද අනුගමනය නොකළ සහ බාල තත්ත්වයේ ආහාර අලෙවි කළ ව්යාපාරික ස්ථාන 1,109 කට එරෙහිව මේ වන විටත් නීතිමය ක්රියාමාර්ග ගෙන ඇත.
උත්සව සමය නිමාවට පත්වන තෙක් මෙම විශේෂ පරීක්ෂණ වැඩසටහන අඛණ්ඩව ක්රියාත්මක කරන බව බොරලැස්ස මහතා වැඩිදුරටත් අවධාරණය කළේය. විශේෂයෙන්ම නිවාඩුවෙන් පසු ජනතාව යළි නගර කරා පැමිණෙන මෙම වකවානුවේදී ආපනශාලා සහ වෙළඳසැල් පිළිබඳව දැඩි අවධානයෙන් පසුවන ලෙසත්, නුසුදුසු ආහාර අලෙවි කරන ස්ථාන පිළිබඳව ප්රදේශයේ මහජන සෞඛ්ය පරීක්ෂකවරයා වෙත වහාම දැනුම් දෙන ලෙසත් මහජනතාවගෙන් ඉල්ලා සිටියි.
