ජාත්යන්තර වෙළෙඳපොළේ ඉන්ධන මිල ශීඝ්රයෙන් ඉහළ යාම හේතුවෙන් මෙරට ක්රියාත්මක පෞද්ගලික ඉන්ධන සමාගම් දැවැන්ත මූල්ය අලාභයකට මුහුණ දී සිටින බව ලංකා ඛනිජ තෙල් නීතිගත සංස්ථාව අනාවරණය කරයි. කොළඹදී පැවති විශේෂ මාධ්ය හමුවක් අමතමින් සංස්ථාවේ සභාපති ජනක රාජකරුණා මහතා සඳහන් කළේ, වත්මන් සිල්ලර මිල යටතේ ඉන්ධන අලෙවි කිරීම නිසා ආර්.එම්. පාර්ක්ස්, සිනොපෙක් සහ එල්.අයි.ඕ.සී. වැනි ප්රධාන පෙළේ පෞද්ගලික සමාගම්වලට ඩීසල් සහ පෙට්රල් ලීටරයකින් රුපියල් විශාල ප්රමාණයක පාඩුවක් දැරීමට සිදුව ඇති බවයි.
ලාභය මුල් කරගත් ව්යාපාරික ආයතන ලෙස අඛණ්ඩව මෙවැනි දැවැන්ත අලාභයක් දරාගත නොහැකි වීම නිසා, ඇතැම් පිරවුම්හල් වෙත ඉන්ධන නිකුත් කිරීම සීමා කිරීමට අදාළ සමාගම් පියවර ගෙන තිබේ. මෙම තත්ත්වය හමුවේ පාරිභෝගික ජනතාව අපහසුතාවට පත්වීම වැළැක්වීම සඳහා විදුලිබල හා බලශක්ති අමාත්යාංශයේ ලේකම්වරයාගේ ප්රධානත්වයෙන් විශේෂ සාකච්ඡා පවත්වා ඇති අතර, එහිදී හඳුනාගත් ප්රමුඛතා පිරවුම්හල් 52ක් වෙත අඛණ්ඩව ඉන්ධන බෙදාහැරීමට එකඟතාවකට පැමිණ ඇත.
පෞද්ගලික සමාගම් ඉන්ධන නිකුත් කිරීම සීමා කළ ද ලංකා ඛනිජ තෙල් නීතිගත සංස්ථාව සතුව ප්රමාණවත් ඉන්ධන සංචිත පවතින බැවින් රට තුළ කිසිදු ඉන්ධන හිඟයක් ඇතිවීමට ඉඩ නොතබන බව සභාපතිවරයා වැඩිදුරටත් අවධාරණය කළේය. කෙසේ වෙතත්, ඉදිරි සතිය තුළ වෙළෙඳපොළ තත්ත්වය සහ පෞද්ගලික සමාගම්වල ඉල්ලීම් පිළිබඳව පුළුල් ලෙස නිරීක්ෂණය කරමින් රජය විසින් මේ සම්බන්ධයෙන් අවසාන තීරණයක් ගැනීමට නියමිතව තිබේ.
