පොදු ප්රවාහන සේවය ජනතාවගේ වඩාත් පහසු සහ ආරක්ෂිත තේරීම බවට පත් කිරීම රජයේ ප්රමුඛ අපේක්ෂාව බව අග්රාමාත්ය ආචාර්ය හරිනි අමරසූරිය මෙනෙවිය අවධාරණය කළාය. “සිහින ගමනාන්තය” (Dream Destination) ජාතික ව්යාපෘතිය යටතේ ඩාවුදි බෝරා සංගමයේ මූල්ය දායකත්වයෙන් නවීකරණය කරන ලද බම්බලපිටිය දුම්රිය ස්ථානය සහ නව පිවිසුම් ගුවන් පාලම මහජන අයිතියට පත් කිරීමේ උත්සවයට එක්වෙමින් අග්රාමාත්යවරිය මෙම අදහස් පළ කළ අතර, රටක සැබෑ දියුණුව මනිනු ලබන්නේ පෞද්ගලික වාහන සංඛ්යාව මත නොව ජනතාව පොදු ප්රවාහනය භාවිත කරන ආකාරය මත බව ඇය පෙන්වා දුන්නාය.
රටක් යනු ආණ්ඩුවකට පමණක් හිමි දෙයක් නොව එහි ජීවත් වන සියලු දෙනාගේම පොදු නිවහන වන බැවින්, මෙතෙක් කාලයක් බිඳ වැටී තිබූ පොදු ප්රවාහන ක්ෂේත්රය නංවාලීම සඳහා රාජ්ය සහ පෞද්ගලික අංශය එකම අරමුණක් වෙනුවෙන් අත්වැල් බැඳගැනීම අගය කළ යුත්තක් බව අගමැතිනිය සඳහන් කළාය. මෙහිදී අදහස් දැක්වූ නාගරික සංවර්ධන නියෝජ්ය අමාත්ය එරංග ගුණසේකර මහතා කියා සිටියේ, ඉදිරි වසරේදී දුම්රිය දෙපාර්තමේන්තුව වෙත වැඩි ප්රතිපාදන වෙන් කරමින් මරදාන සිට මාකුඹුර, පානදුර සහ රාගම දක්වා විදුලි දුම්රිය සේවාවන් ආරම්භ කිරීමටත් කැලණිවැලි දුම්රිය මාර්ගය රත්නපුර දක්වා දීර්ඝ කිරීමටත් රජය සැලසුම් කර ඇති බවයි.
පොදු ප්රවාහන පද්ධතියේ ගුණාත්මකභාවය ඉහළ නැංවීම හරහා මගී ජනතාවට අත්විඳීමට ලැබෙන මෙම පහසුකම් රටේ ආර්ථිකයට මෙන්ම සමාජ සංවර්ධනයට ධනාත්මක බලපෑමක් එල්ල කරනු ඇත. ආණ්ඩුව පමණක් නොව විවිධ ප්රජාවන් සහ පෞද්ගලික අංශයද එක්ව ගොඩනඟන මෙම සාමූහික සංවර්ධන ගමන මඟින් මෙරට යටිතල පහසුකම් ක්ෂේත්රය නව යුගයකට පිවිසෙනු ඇති අතර, ඉදිරියේදී ක්රියාත්මක වන ප්රවාහන නවීකරණ ව්යාපෘති මඟින් ජන ජීවිතය තවදුරටත් සාරවත් වනු ඇතැයි අපේක්ෂා කෙේ.
