ලොව පුරා HIV සහ AIDS ආසාදිතයන්ගේ ව්‍යාප්තිය අඩුවෙමින් පවතින ප්‍රවණතාවකට පටහැනිව, ශ්‍රී ලංකාව තුළ එම රෝගීන්ගේ සංඛ්‍යාව සැලකිය යුතු ලෙස ඉහළ යාමක් වාර්තා වී ඇති අතර, එක්සත් ජාතීන්ගේ ඒඩ්ස් වැඩසටහනට අනුව 2025 වසරේ ආසාදිතයන්ගේ ඉහළ යාමේ වර්ධනයක් පෙන්නුම් කරන ලෝකයේ රටවල් 21 අතර 17 වන ස්ථානය හිමිකර ගැනීමට ශ්‍රී ලංකාවට සිදුව තිබේ. ජාතික ඒඩ්ස් මර්දන ඒකකයේ දත්තවලට අනුව, ගෝලීය වශයෙන් රෝගී වාර්තා වීම පහළ ගියද, 2010 වසරට සාපේක්ෂව 2024 වන විට මෙරට HIV රෝගීන් හමුවීම 48% කින් ඉහළ ගොස් ඇති අතර, 2025 වසරේ පළමු මාස නවය තුළ පමණක් ආසාදිතයන් 639ක් වාර්තා වීමත් සමඟ මෙරට සමස්ත ආසාදිතයන් සංඛ්‍යාව 4,900ත් 6,500ත් අතර අගයක පවතින බව වෛද්‍යවරු අනාවරණ කරති.
මෙම ව්‍යාප්තියේ වැඩි ප්‍රවණතාවක් කොළඹ සහ ගම්පහ යන දිස්ත්‍රික්කවලින් දැකගත හැකි වී ඇති අතර, විශේෂඥ වෛද්‍යවරුන් පෙන්වා දෙන පරිදි කාන්තාවන්ට වඩා පිරිමින් මෙම තත්ත්වයට වැඩි වශයෙන් ගොදුරු වී ඇත්තේ මත්ද්‍රව්‍ය ලබාගැනීමේදී ඉන්ජෙක්ෂන් වැනි ක්‍රමවේද භාවිත කිරීමේ අවදානම හේතුවෙනි. සමාජමය වශයෙන් බරපතළ සෞඛ්‍ය අභියෝගයක් බවට පත්ව ඇති මෙම තත්ත්වය පාලනය කිරීම සඳහා සෞඛ්‍ය අංශ විසින් කොළඹ සහ ගම්පහ දිස්ත්‍රික්ක කේන්ද්‍ර කරගනිමින් විශේෂ ජංගම සායන වැඩසටහන් ක්‍රියාත්මක කර තිබුණද, රෝග ව්‍යාප්තියේ වේගය හමුවේ ජාතික මට්ටමේ පුළුල් සෞඛ්‍ය දැනුවත් කිරීමේ යාන්ත්‍රණයක දැඩි අවශ්‍යතාව මතුව තිබේ.
මෙරට සෞඛ්‍ය ක්ෂේත්‍රයට සහ සමාජ ආරක්ෂණයට එල්ල වී ඇති මෙම වක්‍ර අභියෝගය සාර්ථකව පාලනය නොකළහොත්, ඉදිරි කාලය තුළ රෝගී සංඛ්‍යාව තවදුරටත් ඉහළ ගොස් රටේ ශ්‍රම බලකායට සහ සෞඛ්‍ය පද්ධතියට දැඩි බරක් වනු ඇත. එබැවින්, අදාළ සෞඛ්‍ය ආයතන මඟින් හඳුන්වා දී ඇති පරීක්ෂණ සහ සායන පහසුකම් වෙත ජනතාව යොමුවීම ධෛර්යමත් කිරීම මෙන්ම, මත්ද්‍රව්‍ය භාවිතය වැළැක්වීමේ නිවාරණ ක්‍රියාමාර්ග දැඩි කිරීම මඟින් පමණක් මෙම අවදානම් තත්ත්වය පාලනය කර ගත හැකි වනු ඇත.
