වෙළෙඳපොලේ අලෙවියට ඇති සියලු පලතුරු වස විසෙන් තොර සෞඛ්‍යාරක්ෂිත නිෂ්පාදන බවට පත් කිරීමේ සහ ඒවා සහතික කිරීමේ විශේෂ වැඩපිළිවෙලක් ක්‍රියාත්මක කිරීමට පියවර ගෙන තිබේ.
වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්‍ය වසන්ත සමරසිංහ මහතාගේ ප්‍රධානත්වයෙන් පැවති විශේෂ සාකච්ඡාවකදී මෙම තීරණය ගෙන ඇත. සෞඛ්‍යාරක්ෂිතව පලතුරු ඉදවන්නන් හඳුනාගෙන ඔවුන් සහතිකකරණයට ලක් කිරීම, පලතුරු ගොවීන් සහ වෙළෙඳුන් දැනුවත් කිරීම සහ යහපත් කෘෂිකාර්මික පිළිවෙත් (GAP) වෙත ඔවුන් දිරිමත් කිරීම මෙම වැඩපිළිවෙලේ මූලික අරමුණයි.
මෙම ව්‍යාපෘතිය යටතේ රසායනික ද්‍රව්‍ය භාවිතයෙන් තොරව, SLS 1767 සහ GMP ප්‍රමිතීන්ට අනුකූලව පලතුරු ඉදවන වෙළෙඳුන් සඳහා විශේෂ සහතිකයක් ලබා දීමටත්, එතිලීන් වායුව භාවිත කරන සුරක්ෂිත ඉදවීමේ කුටීර සඳහා ප්‍රමිතීන් සකස් කර කුඩා හා මධ්‍ය පරිමාණ වෙළෙඳුන්ට තාක්ෂණික සහාය ලබා දීමටත් කටයුතු යොදා ඇත. මීට අමතරව, වෙළෙඳපොළට එන පලතුරු පරීක්ෂා කිරීම සඳහා ඉතා කෙටි කාලයකදී රසායනික ශේෂ හඳුනාගත හැකි ක්ෂණික පරීක්ෂණ කට්ටල හඳුනාගෙන මිලදී ගැනීමටත්, කෘෂිකර්ම දෙපාර්තමේන්තුව, ශ්‍රී ලංකා ප්‍රමිති ආයතනය සහ කාර්මික තාක්ෂණ ආයතනය ඇතුළු ආයතන එකතු වී වස විසෙන් තොර පලතුරු ඉදවන ආදර්ශ තාක්ෂණික කුටි සකස් කිරීමටත් නියමිතය.
මෙම ක්‍රියාමාර්ග හරහා පලතුරු ආශ්‍රිත පසු අස්වනු හානි අවම කරගැනීමටත්, පාරිභෝගික ජනතාවට වස-විසෙන් තොර ගුණාත්මක පලතුරු ලබා දීමටත් හැකි වනු ඇතැයි අපේක්ෂා කෙරේ.
