ලෝක බැංකුවේ නවතම වාර්තාවට අනුව, ඒකපුද්ගල දළ දේශීය නිෂ්පාදිතයේ (GDP per Capita) වර්ධන වේගය අතින් දකුණු ආසියාවේ ප්රථම ස්ථානය දිනා ගැනීමට ශ්රී ලංකාව සමත්ව ඇත. 2024 වසරේදී ඇමෙරිකානු ඩොලර් 4,545ක් ලෙස පැවති ශ්රී ලංකාවේ ඒකපුද්ගල දළ දේශීය නිෂ්පාදිතය, 2025 වසරේදී ඩොලර් 5,002ක් දක්වා 10%ක කැපී පෙනෙන වර්ධනයක් සටහන් කර තිබේ. මෙම ලැයිස්තුවේ මාලදිවයින 9%ක වර්ධනයක් ද, පාකිස්තානය 8%ක් ද, භූතානය 6%ක් ද, නේපාලය 5%ක් සහ ඉන්දියාව 4%ක වර්ධනයක් ද අත්කරගෙන ඇති අතර, මේ වසරේ මුල් භාගයේදී ද ශ්රී ලංකාව 5.1%ක ධනාත්මක ආර්ථික වර්ධනයක් පවත්වා ගෙන ඇත. ඉදිරියේදී මෙරට වාර්ෂික ආර්ථික වර්ධනය 3.5%ත් 4.8%ත් අතර මට්ටමක ස්ථාවර වනු ඇතැයි ද ලෝක බැංකුව පුරෝකථනය කරයි.
සාර්ව ආර්ථික ස්ථාවරත්වය සනාථ කරමින් ශ්රී ලංකාවේ භාවිත කළ හැකි විදේශ සංචිත ප්රමාණය ඇමෙරිකානු ඩොලර් බිලියන 5.4 දක්වා ඉහළ ගොස් ඇති අතර, උද්ධමනය 6.8%ක මට්ටමක සාර්ථකව පාලනය කර තිබේ. එසේම මෙරට විරැකියා අනුපාතය ද 4.4%ක් දක්වා යහපත් මට්ටමකට ස්ථාවර වී ඇති බව ලෝක බැංකු වාර්තාවේ සඳහන් වේ. කෙසේ වෙතත්, මෙම ආර්ථික ස්ථාවරත්වය අඛණ්ඩව ඉදිරියට පවත්වාගෙන යාම සඳහා ව්යුහාත්මක ප්රතිසංස්කරණ සිදු කිරීම, පෞද්ගලික ආයෝජන දිරිමත් කිරීම සහ තවමත් ඉහළ මට්ටමක පවතින දරිද්රතාවය පිටුදැකීම අත්යවශ්ය සහ තීරණාත්මක සාධක වන බව ද ලෝක බැංකුව වැඩිදුරටත් අවධාරණය කරයි.
