මත්පැන් බෝතල්වල ආරක්ෂිත ස්ටිකර් ඇලවීමට අදාළව මෑතකදී කැඳවන ලද ටෙන්ඩරයේ අල්ලස් සහ දූෂණ වැළැක්වීම සඳහා වන ISO-37001 සහතිකය අනිවාර්ය කර තිබූ කොන්දේසිය ඉවත් කර ඒ වෙනුවට අතිරේක ලකුණු ලබාදීමේ ක්රමවේදයක් හඳුන්වා දීමත් සමඟ සුරාබදු දෙපාර්තමේන්තු ආරංචි මාර්ග සහ බලපත්රලාභී අලෙවිකරුවන් අතර දැඩි ආන්දෝලනයක් හටගෙන තිබේ. කිසියම් පාර්ශ්වයක බලපෑමක් මත මෙම ප්රමිතී කොන්දේසිය සංශෝධනය කර ඇති බවට චෝදනා එල්ල වන අතර, මීට පෙර අවස්ථා කිහිපයකදී ද ලංසු කොන්දේසි වෙනස් කරමින් අදාළ කාල සීමාව ඔක්තෝබර් මස 6 වැනි දින දක්වා දීර්ඝ කිරීමට බලධාරීන් පියවර ගෙන තිබීම වත්මන් ක්රියාවලිය පිළිබඳ සාධාරණ සැකයක් මතු කර ඇත.
රජය ප්රකාශිත දූෂණ විරෝධී ප්රතිපත්තියකට අනුව රට මෙහෙයවන පසුබිමක, මෙවැනි ප්රධාන පෙළේ ටෙන්ඩරයකින් විනිවිදභාවය තහවුරු කරන ප්රමිතීන් ඉවත් කිරීම හරහා දූෂණ ක්රියාවලියට යළි මංපෙත් විවර විය හැකි බවත්, දූෂණ විරෝධී පසුබිමක් නොමැති පාර්ශ්වයන්ටද මෙම සැපයුම් සඳහා ඉදිරිපත් වීමට ඉඩ සැලසීමෙන් රාජ්ය ආදායමට බරපතළ පාඩුවක් සිදුවිය හැකි බවත් සුරාබදු දෙපාර්තමේන්තු ජ්යෙෂ්ඨ නිලධාරීන් මෙන්ම මත්පැන් අලෙවිකරුවන්ගේ සංගමය දැඩිව පෙන්වා දෙයි. මුල් ටෙන්ඩර් කොන්දේසිවල දැඩි නීති පැනවුවද, නව සංශෝධන යටතේ අනෙකුත් ජාත්යන්තර සහතික කිහිපයක් ප්රමාණවත් වීම මත තරඟකාරීත්වය මුවාවෙන් පාලන තන්ත්රයේ විනිවිදභාවය දුර්වල වීමේ අවදානමක් පවතින බව විචාරකයෝ මත පළ කරති.
මෙම මතභේදකාරී තත්ත්වය හමුවේ ඉදිරි ටෙන්ඩර් කාලසීමාව තුළ අදාළ ක්රියාවලිය සම්පූර්ණයෙන්ම විනිවිදභාවයකින් යුතුව සිදුකිරීමට බලධාරීන් කටයුතු කරන්නේද යන්න මෙන්ම, පද්ධතිය තුළ ඇති වී තිබෙන මෙම ප්රතිපත්තිමය ගැටලුව සම්බන්ධයෙන් රජයේ ඉහළ පෙළේ අවධානය යොමු වේද යන්න ඉදිරියේදී දැඩි ලෙස පරීක්ෂාවට ලක් වනු ඇත. මහජන මුදල් හා රාජ්ය බදු ආදායම් සුරක්ෂිත කිරීම සඳහා එවැනි ප්රසම්පාදන ක්රියාවලීන්හි පවතින හිඩැස් සහ අක්රමිකතා කඩිනමින් නිවැරදි නොකළහොත්, එය සමස්ත ආර්ථික පාලනයට සහ රාජ්ය ආයතනවල විශ්වසනීයත්වයට දැඩි බලපෑමක් එල්ල කරනු නිසැකය.
