UNCCD COP17 සමුළුවට සමගාමීව, ශ්රී ලංකාවේ ගරු පරිසර අමාත්ය වෛද්ය දම්මික පටබැඳි මහතා සහ මොංගෝලියාවේ පරිසර හා දේශගුණික විපර්යාස පිළිබඳ අමාත්ය සැන්ඩාග්-ඔචිර් සෙන්ඩ් (Sandag-Ochir Tsend) මහතා අතර විශේෂ හමුවක් පවත්වන ලදී.
මෙම සාකච්ඡාවේදී, UNCCD COP17 සමුළුව සාර්ථකව පැවැත්වීම සඳහා මොංගෝලියානු රජය ලබාදෙන නායකත්වය සහ සූදානම අගය කළ ශ්රී ලංකා පරිසර අමාත්යතුමා, සමුළුවේ සාර්ථක ප්රතිඵල සඳහා ශ්රී ලංකාවේ පූර්ණ සහයෝගය පළ කළේය.
දෙරටටම බලපානු ලබන පාරිසරික ගැටළු ලෙස භූමි හායනය, නියඟය, ජල හිඟය සහ පරිසර පද්ධති අවදානම් වැනි පොදු අභියෝග හඳුනාගෙන ඇති අතර, භූමි ප්රතිස්ථාපනය, තිරසර භූමි හා ජල කළමනාකරණය, වන සම්පත් සහ වනජීවී සංරක්ෂණය, නියඟයට ඔරොත්තු දීම සහ 2030 වන විට LDN ඉලක්කය ළඟා කර ගැනීම සම්බන්ධයෙන් දැනුම, තාක්ෂණය හා අත්දැකීම් හුවමාරු කර ගැනීමේ වැදගත්කම මෙහිදී දැඩි ලෙස අවධාරණය කෙරිණි.
එමෙන්ම, දේශගුණික මූල්ය, තාක්ෂණික සහයෝගීතාව සහ ධාරිතා සංවර්ධනය ශක්තිමත් කිරීමත්, UNEA-8 ඇතුළු ජාත්යන්තර හා කලාපීය පාරිසරික ක්රියාවලීන්හිදී දෙරටේ සහයෝගීතාව වැඩිදියුණු කිරීමත් පිළිබඳව සාකච්ඡා විය. ඉදිරි සහයෝගීතාව සඳහා භූමි ප්රතිසංස්කරණය, නියඟයට ඔරොත්තු දීම, තිරසර ජල කළමනාකරණය, තාක්ෂණික දැනුම හුවමාරුව සහ ධාරිතා සංවර්ධනය ප්රමුඛ ක්ෂේත්ර ලෙස හඳුනා ගනු ලැබීය.
ශ්රී ලංකාව සහ මොංගෝලියාව අතර මෙම ද්විපාර්ශ්වික සහයෝගීතාව ආසියා–පැසිෆික් කලාපයේ පොදු පාරිසරික ප්රමුඛතා ඉදිරියට ගෙන යාමට සහ සංවර්ධනය වෙමින් පවතින රටවල හඬ ශක්තිමත් කිරීමට විශාල දායකත්වයක් වනු ඇතැයි අමාත්යවරුන් දෙපළ මෙහිදී අදහස් දැක්වූහ.
