මෙරට සමුපකාර ව්යාපාරය සතු ජනතා විශ්වාසය අඛණ්ඩව සුරක්ෂිත කරමින් එය වඩාත් විනිවිදභාවයෙන් හා ශක්තිමත්ව ඉදිරියට ගෙන යාමේ අරමුණින් පුළුල් නීතිමය ප්රතිසංස්කරණයක් සිදුකිරීමට පියවර ගනිමින් නව සමුපකාර පනත් කෙටුම්පතක් සකස් කිරීම සඳහා වන විශේෂ දෙදින වැඩමුළුවක් කොළඹදී ආරම්භ විය. වර්තමාන සමූපකාර පනතේ පවතින නීතිමය හිස්තැන් සහ අඩුපාඩු මතුවී ඇති පසුබිමක් තුළ, මෙම නව පනත හරහා ආයතනික විනය තහවුරු කිරීමටත්, මහජන මුදල් අවභාවිත කරන පාර්ශ්ව වෙත දැඩි නීතිමය ක්රියාමාර්ග ගැනීමටත් රජය දැඩි අවධානයක් යොමු කර ඇත.
දෙරටේ මෙන්ම සමස්ත සමූපකාර ක්ෂේත්රයේම බලධාරීන්ගේ අවධානය දිනාගත් මෙම වැඩමුළුවේ ආරම්භක අවස්ථාවට වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්ය වසන්ත සමරසිංහ මහතුන් ඇතුළු උසස් රාජ්ය නිලධාරීන් සහ පළාත් ආණ්ඩුකාරවරුන් පිරිසක් එක්ව සිටියහ. සමුපකාර ව්යාපාරය ජනතා විශ්වාසය දිනූ ශක්තිමත් කුළුණක් ලෙස ඉදිරියට ගෙනයාම සඳහා පවතින නීති පද්ධතියේ දැඩි සංශෝධන සිදුකිරීමේ කාලීන අවශ්යතාව අමාත්යවරයා මෙහිදී දැඩි ලෙස අවධාරණය කළ අතර, මහජනතාව තැන්පත් කළ මූල්ය සම්පත්වල ආරක්ෂාව තහවුරු කිරීම රජයේ මූලික වගකීම බවද පෙන්වා දුන්නේය.
මෙම සංකල්ප පත්රිකාව පදනම් කරගනිමින් ඉදිරියට ක්රියාත්මක වන නීති කෙටුම්පත් කිරීමේ ක්රියාවලිය හරහා, අනාගතයේදී සමූපකාර සමිති හා බැංකු පද්ධතිය වඩාත් කාර්යක්ෂම හා වගකීම්සහගත ආයතන බවට පරිවර්තනය වනු ඇතැයි අපේක්ෂා කෙරේ. මහජනතාව සමූපකාරය කෙතෙක් දුරට තැබූ විශ්වාසය රකිමින්, නීතිවිරෝධී වංචාවලින් තොර ස්ථාවර ආර්ථික හා සමාජීය පසුබිමක් රට තුළ නිර්මාණය කිරීම මෙම නව පනතේ මූලික අපේක්ෂාව වන අතර, ඒ සඳහා අවශ්ය සමස්ත රාජ්ය යාන්ත්රණයම මේ වන විට ක්රියාත්මක කර තිබේ.
