සැප්තැම්බර් 22 සහ 23 දිනවලට නියමිතව තිබූ පාර්ලිමේන්තු කටයුතුවල වෙනස්කම් කිහිපයක් සිදුකර තිබෙනවා.
ඒ අනුව, සැප්තැම්බර් 22 දින පැවැත්වීමට නියමිතව තිබූ අපනයන කෘෂිකර්මාන්තය ප්රවර්ධන (සංශෝධන) පනත් කෙටුම්පතේ දෙවැනි වර කියවීමේ විවාදය සැප්තැම්බර් 23 දින පැවැත්වීමට තීරණය කර තිබෙනවා. එසේම, එදිනට නියමිතව තිබූ ශ්රී ලංකා වරලත් මාධ්ය වෘත්තිකයන්ගේ ආයතනය පනත් කෙටුම්පත ඉදිරිපත් නොකිරීමටද තීරණය කර ඇති බව සඳහන්.
මේ අතර, විදුලි බිල්පත් සම්බන්ධයෙන් මහජනතාවට සහන සැලසීම සඳහා රුපියල් මිලියන 17,213ක මූල්ය සහනාධාරයක් ලබාදීමට අදාළ පරිපූරක ඇස්තමේන්තුව සැප්තැම්බර් 22 දින පාර්ලිමේන්තුවට ඉදිරිපත් කිරීමට නියමිතයි. එය සැප්තැම්බර් 23 දින අනුමත කිරීමටද නියමිතව තිබෙනවා.
අදාළ සහනාධාරය සඳහා අවශ්ය ප්රතිපාදන, 2026 වසරේ රේඛීය අමාත්යාංශ වෙත වෙන්කර ඇති සහ වසර අවසන් වනවිට උපයෝජනය නොවන බවට හඳුනාගෙන ඇති ප්රතිපාදන මගින් සපයා ගැනීමට නියමිත බව පාර්ලිමේන්තුව සඳහන් කරනවා.
කෙසේ වෙතත්, සැප්තැම්බර් 24 සහ 25 දිනවලට නියමිත පාර්ලිමේන්තු කටයුතුවල වෙනසක් සිදු නොවන බව මහ ලේකම්වරිය සඳහන් කර තිබෙනවා. එම දින දෙකේදී 22 වැනි ආණ්ඩුක්රම ව්යවස්ථා සංශෝධන පනත් කෙටුම්පත සහ අධිකරණ සංවිධාන (සංශෝධන) පනත් කෙටුම්පත විවාදයට ගැනීමට නියමිතයි.
22 වැනි ආණ්ඩුක්රම ව්යවස්ථා සංශෝධනය සම්බන්ධයෙන් ශ්රේෂ්ඨාධිකරණය ලබාදුන් තීරණය කථානායක ජගත් වික්රමරත්න මහතා වෙත ලැබී ඇති බවද කථානායක කාර්යාලය සඳහන් කරනවා.
