ශ්රී ලංකා පොලිසිය සහ පොලිස් විශේෂ කාර්ය බලකාය (STF) එක්ව දිවයින පුරා පවතින පුරප්පාඩු පිරවීම සඳහා ආධුනික පොලිස් කොස්තාපල්, කාන්තා පොලිස් කොස්තාපල් සහ පොලිස් කොස්තාපල් රියදුරු තනතුරු සඳහා නවක නිලධාරීන් 7,500ක් පමණ බඳවා ගැනීමට තීරණය කර තිබේ. මෙම බඳවා ගැනීම් උතුරු සහ නැගෙනහිර පළාත් ඇතුළුව සමස්ත දිවයිනම ආවරණය වන පරිදි සිදු කෙරෙන අතර, විනයගරුක සහ කැපවීමෙන් යුත් තරුණ තරුණියන්ට මේ සඳහා අයදුම් කිරීමට අවස්ථාව පවතී. උනන්දුවක් දක්වන අයදුම්කරුවන් විසින් ශ්රී ලංකා පොලිසියේ නිල වෙබ් අඩවිය වන www.police.lk වෙත පිවිස එහි ඇති “Join Us” අංශය හරහා හෝ නිල නිවේදනයේ දක්වා ඇති QR කේතය ස්කෑන් කිරීම මඟින් මාර්ගගතව (Online) සිය අයදුම්පත් යොමු කළ යුතුය.
අයදුම්පත් භාරගන්නා අවසාන දිනය 2026 මැයි මස 08 වැනිදා ලෙස ප්රකාශයට පත් කර ඇති අතර, මෙම බඳවා ගැනීමේ ක්රියාවලිය සම්බන්ධයෙන් වැඩිදුර තොරතුරු හෝ සහාය අවශ්ය අයදුම්කරුවන්ට පොලිස් බඳවා ගැනීමේ අංශයේ 071-8591925, 011-2505202 හෝ 011-2552953 යන දුරකථන අංක ඔස්සේ විමසීම් කළ හැකිය. පොලිස් දෙපාර්තමේන්තුව විසින් ජනමාධ්ය ආයතනවලින් ද ඉල්ලා සිටින්නේ මෙම බඳවා ගැනීමේ පුවත මහජනයා අතර බහුලව ප්රචාරය කරන ලෙසයි. තෝරා ගනු ලබන අපේක්ෂකයන්ට විධිමත් පුහුණුවකින් පසුව දිවයිනේ ඕනෑම ප්රදේශයක රාජකාරි සඳහා අනුයුක්ත වීමට අවස්ථාව හිමිවනු ඇත.
