ජනාධිපති අනුර කුමාර දිසානායක මහතා ඊයේ (අප්රේල් 19) පස්වරුවේ වැල්ලවත්ත පිහිටි අමරපුර මහා නිකායේ සංඝ මූලස්ථානය වෙත පැමිණ ශ්රී ලංකා අමරපුර මහා නිකායේ මහානායක කරගොඩ උයන්ගොඩ මෛත්රීමූර්ති මහානායක හිමිපාණන් වහන්සේ ප්රමුඛ මහා සංඝරත්නය බැහැදැක ආශීර්වාද ලබා ගත්තේය. එහිදී මහා සංඝරත්නය විසින් සෙත් පිරිත් සජ්ඣායනා කර ජනාධිපතිවරයාගේ ඉදිරි කටයුතු සාර්ථක කර ගනිමින් ලස්සන රටක් ගොඩනැඟීමට අවශ්ය ශක්තිය සහ ධෛර්යය ප්රාර්ථනා කරන ලදී.
මෙම අවස්ථාවට අමරපුර මහා සංඝ සභාවේ වැඩබලන සභාපති මාගාල්ලේ නාගිත නායක හිමි, මහා ලේඛකාධිකාරි බළපිටියේ සිරිසීවලි හිමි ඇතුළු නිකායේ ප්රධාන නායක ස්වාමීන් වහන්සේලා රැසක් වැඩම කර සිටි අතර ජනාධිපතිවරයා උන්වහන්සේලා සමඟ සුහද පිළිසඳරකට ද එක් විය. ශ්රී ලංකා අමරපුර මහා නිකායේ දායක සභාවේ සභාපති දේශමාන්ය අජිත ද සොයිසා සහ භාණ්ඩාගාරික ධම්මික සමරවික්රම යන මහත්වරුන් ඇතුළු දායක සභාවේ පිරිසක් ද මෙම ආගමික වැඩසටහනට සහභාගී වූහ.
පවතින දේශපාලන සහ සමාජීය අභියෝග මධ්යයේ ජනාධිපතිවරයා මෙලෙස මහා සංඝරත්නයේ අවවාද සහ අනුශාසනා ලබා ගැනීම රටේ ඉදිරි ගමනට මහත් ශක්තියක් වනු ඇති බව දායක සභාව පෙන්වා දෙයි. විශේෂයෙන්ම අමරපුර මහා නිකාය මෙරට බෞද්ධ ශාසනයට සහ සමාජ උන්නතියට සිදුකරන සේවය ජනාධිපතිවරයා මෙහිදී අගය කළ අතර රට ගොඩනැඟීමේ කාර්යයේදී ආගමික නායකයන්ගේ මඟපෙන්වීම නිරන්තරයෙන් අපේක්ෂා කරන බව ද සඳහන් කළේය.
