මහජන ප්‍රවාහන සේවය ශ්‍රී ලංකාවේ නිදහස් සෞඛ්‍යය හා අධ්‍යාපන පද්ධතීන් සමඟ සමාන මට්ටමක තැබිය යුතු බව ජනාධිපති අනුර කුමාර දිසානායක මහතා අවධාරණය කළ බව ප්‍රවාහන, මහාමාර්ග හා නගර සංවර්ධන අමාත්‍ය බිමල් රත්නායක මහතා පවසයි. තලංගම ප්‍රදේශයේදී නව මෙට්‍රෝ බස් සේවය ආරම්භ කිරීමේ අවස්ථාවට එක්වෙමින් අමාත්‍යවරයා මේ බව සඳහන් කළේය. කොළඹ අවට මගී තදබදය අවම කරමින් ආරක්ෂිත හා සුවපහසු ප්‍රවාහන සේවයක් සැපයීමේ අරමුණින් බස් රථ 112ක් බස්නාහිර පළාතේ මාර්ග 7ක් මත මෙලෙස ධාවනයට එක් කර තිබේ.
මෙම මෙට්‍රෝ බස් ව්‍යාපෘතිය ක්‍රියාත්මක කිරීම සඳහා රජය රුපියල් බිලියන 7.5ක පමණ ආයෝජනයක් සිදු කර ඇති බවත්, වසරකටත් අඩු කාලයක් තුළ මෙම ව්‍යාපෘතිය සාර්ථක කර ගැනීමට හැකි වූ බවත් අමාත්‍යවරයා කියා සිටියේය. ඉදිරි සිංහල හා දෙමළ අලුත් අවුරුද්දට පෙර යාපනය, මහනුවර සහ ගාල්ල වැනි නගර ආවරණය වන පරිදි තවත් අන්තර් නාගරික බස් රථ 50ක් හඳුන්වා දීමට නියමිතය. මීට අමතරව, වාහන තදබදය පාලනය කිරීම සඳහා ‘රිය ගාල් කර ගමන් කිරීමේ’ (Park-and-Ride) ක්‍රමයක් හඳුන්වා දෙන ලෙස නගරාධිපතිවරුන්ගෙන් ඉල්ලා සිටින බවද, ඉදිරියේදී මෙම සේවය දිවයිනේ ප්‍රධාන නගර රැසකට සහ පෞද්ගලික අංශය වෙතද පුළුල් කිරීමට අපේක්ෂා කරන බවද හෙතෙම වැඩිදුරටත් සඳහන් කළේය.
