සමාජ සාධාරණත්වය සහ සමානාත්මතාව මත පදනම්ව, කිසිදු දරුවෙකු අධ්‍යාපන ක්‍රියාවලියෙන් බැහැර නොවී ඉදිරියට යා හැකි අන්තර්කරණ අධ්‍යාපන (Inclusive Education) ක්‍රමයක් රට තුළ ස්ථාපිත කිරීම සිය අධ්‍යාපන ප්‍රතිපත්තියේ ප්‍රධාන වගකීම බව අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය මහත්මිය ප්‍රකාශ කළාය.
ඇය මේ බව සඳහන් කළේ ලංකාවේ අන්තර්කරණ අධ්‍යාපනය පිළිබඳ පර්යේෂණ සොයාගැනීම් ප්‍රචලිත කිරීම සඳහා 2026 ජූලි 08 දින කොළඹදී පැවති වැඩමුළුවකට එක්වෙමිනි. අධ්‍යාපන අමාත්‍යාංශය සහ UNICEF ආයතනය එක්ව සංවිධානය කළ මෙම වැඩමුළුවේ මූලික අරමුණ වූයේ විශේෂ අවශ්‍යතා සහිත දරුවන් මෙන්ම අවාසිසහගත හා අවදානම් සහගත තත්ත්වයන් තුළ ජීවත්වන දරුවන්ට ද බාධාවන්ගෙන් තොරව අධ්‍යාපනය ලැබීමට අවස්ථාව සලසා දීමයි.
අග්‍රාමාත්‍යවරිය මෙහිදී වැඩිදුරටත් අවධාරණය කළේ නිදහස් අධ්‍යාපන සංකල්පය තුළ පවතින සමාජ සාධාරණත්වය තහවුරු කිරීම සඳහා අන්තර්කරණ අධ්‍යාපනය අත්‍යවශ්‍ය බවයි. වර්තමාන අධ්‍යාපන පද්ධතිය තුළ පවතින පුද්ගලවාදී සහ තරගකාරී ස්වභාවය නිසා විශාල දරුවන් පිරිසක් ඉන් බැහැර වන බව පෙන්වා දුන් ඇය, එම තත්ත්වය වෙනස් කරමින් සෑම දරුවෙකුටම සම වරප්‍රසාදිත අධ්‍යාපනයක් ලබාදීම රජයේ වගකීම බව පැවසුවාය.
මෙම අවස්ථාවට එක්වූ අධ්‍යාපන හා උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න මහතා ප්‍රකාශ කළේ, පාසල් තුළ යටිතල පහසුකම් සංවර්ධනය, ආබාධ සහිත සිසුන් සඳහා ප්‍රවේශ පහසුකම් සැපයීම සහ විවිධ භාෂාවන්ගෙන් අධ්‍යාපනය ලැබීමට අවස්ථාව උදාකර දීම තුළින් වඩාත් ඵලදායී අන්තර්කරණ අධ්‍යාපන පරිසරයක් ගොඩනැගිය හැකි බවයි.
අධ්‍යාපන ක්ෂේත්‍රයේ වෘත්තිකයින්ට පර්යේෂණාත්මක දැනුම ලබාදීම සහ රාජ්‍ය ආයතන ඒකාබද්ධ කරමින් ඉදිරි අධ්‍යාපන සැලසුම් සකස් කිරීම මෙම වැඩමුළුව හරහා සිදු කෙරිණි. අග්‍රාමාත්‍යවරිය, නියෝජ්‍ය අමාත්‍යවරයා, අමාත්‍යාංශ ලේකම්වරුන්, රාජ්‍ය නිලධාරීන් සහ UNICEF නියෝජිතයින් ඇතුළු පිරිසක් මෙම අවස්ථාවට සහභාගි වූහ.
