“Travel And Tour World (TTW)” ආයතනය විසින් නිකුත් කරන ලද 2026 වසර සඳහා වූ ලොව හොඳම ආහාර ගමනාන්ත 50 ලැයිස්තුවට ශ්රී ලංකාව ඇතුළත් වී තිබේ. රටක සූපශාස්ත්ර උරුමය, විවිධත්වය, වීදි ආහාර සංස්කෘතිය, තිරසාර බව සහ සමස්ත ආහාර අත්දැකීම් වැනි සාධක ගණනාවක් පදනම් කර ගනිමින් මෙම ශ්රේණිගත කිරීම සිදු කර ඇත.
ශ්රී ලංකාවේ නැවුම් මුහුදු ආහාර, දේශීය කුළුබඩු සහ සුවිශේෂී සංස්කෘතික රසයන් ලෝකයේ සංචාරකයන් අතර මෙලෙස ප්රසාදයට ලක්ව තිබේ. විශේෂයෙන්ම බත් සහ කරි, ආප්ප, කොත්තු වැනි දේශීය ආහාර මෙන්ම විවිධ කලාපවලට ආවේණික රසයන් ජාත්යන්තර අවධානය දිනා ගැනීමට සමත් වී ඇත.
මෙම වාර්තාවට අනුව ශ්රී ලංකාවේ ආහාර අත්දැකීම් සඳහා සංචාරය කළ යුතු ප්රධාන නගර 10ක් ද හඳුනාගෙන තිබේ. කොළඹ නගරය බත් සහ කරි, කොත්තු රොටි, ආප්ප සහ නැවුම් මුහුදු ආහාර සඳහා ප්රසිද්ධියක් උසුලයි. ගාල්ල නගරය මුහුදු ආහාර, ශ්රී ලංකා කරි සහ යටත් විජිත සමයේ සිට පැවත එන ආහාර සඳහා ප්රකටය. මහනුවර නගරය බත් සහ කරි, සාම්ප්රදායික කැවිලි සහ දේශීය ආහාර සඳහා ප්රසිද්ධය. මීගමුව නගරය මුහුදු ආහාර කරි, ග්රිල් කළ මාළු සහ කලපු ආශ්රිත විශේෂ ආහාර සඳහා ප්රසිද්ධ වේ. ඇල්ල නගරය කාබනික නිෂ්පාදන සහ කඳුකර ආහාර අත්දැකීම් සඳහා ප්රකටය. යාපනය නගරය දැල්ලන් කරි, දෝසා සහ උතුරුකරයට ආවේණික රසයන් සඳහා ප්රසිද්ධය. මිරිස්ස නගරය නැවුම් මුහුදු ආහාර සහ වෙරළාසන්න ආහාර අත්දැකීම් සඳහා ප්රකටය. නුවරඑළිය නගරය තේ ආශ්රිත ආහාර, පේස්ට්රි සහ යටත් විජිත සමයේ ආහාර සඳහා ප්රසිද්ධය. හික්කඩුව නගරය නැවුම් මුහුදු ආහාර සහ වෙරළාසන්න ආහාර අත්දැකීම් සඳහා ප්රකට වන අතර ත්රිකුණාමලය නගරය නැවුම් මුහුදු ආහාර සහ වෙරළබඩ ආහාර සඳහා ප්රසිද්ධියක් උසුලයි.
ලැයිස්තුවේ පෙරමුණේ මෙක්සිකෝව, ඉතාලිය සහ ස්පාඤ්ඤය පසුවන අතර, මෙම පිළිගැනීම ශ්රී ලංකාවේ සංචාරක ව්යාපාරය තවදුරටත් ශක්තිමත් කිරීමටත්, අව්යාජ ආහාර සංස්කෘතියක් සොයන විදෙස් සංචාරකයන් වැඩි වශයෙන් ආකර්ෂණය කර ගැනීමටත් ඉවහල් වනු ඇතැයි අපේක්ෂා කෙරේ.
