ශ්රී ලංකාවේ මලෛයහ දෙමළ තේ වතු කම්කරුවන්ගේ මානව හිමිකම් සහ කම්කරු අයිතිවාසිකම් උල්ලංඝනය වන බවට ඇම්නෙස්ටි ඉන්ටර්නැෂනල් සංවිධානය නිකුත් කළ නවතම වාර්තාවේ අඩංගු කරුණු රජය විසින් සම්පූර්ණයෙන්ම ප්රතික්ෂේප කර තිබේ. මෙම වාර්තාවේ අඩංගු චෝදනා සාවද්ය බව වතු හා ප්රජා යටිතල පහසුකම් අමාත්ය සමන්ත විද්යාරත්න මහතා පාර්ලිමේන්තුවේදී ප්රකාශ කළේය.
මෙම චෝදනා පිටුපස ජාත්යන්තර වැවිලි භෝග වෙළඳපොළේ පවතින තරඟකාරිත්වය බලපෑ හැකි බව අමාත්යවරයා පෙන්වා දුන්නේය. එවැනි වාර්තා මගින් රටේ ආර්ථිකයට සහ ජනතාවගේ ජීවනෝපායට බලපෑම් සිදුවිය හැකි බැවින් මේ පිළිබඳව අවධානයෙන් කටයුතු කළ යුතු බව ඔහු වැඩිදුරටත් පැවසීය. වතු අමාත්යාංශය සහ කම්කරු අමාත්යාංශය එක්ව රජයේ නිල පිළිතුර සකස් කිරීම සඳහා සාකච්ඡා පවත්වමින් සිටින අතර, ඒ සඳහා වන සත්ය කරුණු ඉදිරියේදී ඉදිරිපත් කිරීමට නියමිතය.
වතු කම්කරුවන්ගේ ජීවන තත්ත්වය නංවාලීම සඳහා රජය ගෙන ඇති පියවර පිළිබඳව ද අමාත්යවරයා අදහස් දැක්වීය. වත්මන් රජය යටතේ වතු කම්කරුවන්ගේ දෛනික වැටුප රුපියල් 400කින් ඉහළ නංවා ඇති අතර, ඉන් රුපියල් 200ක් රජය විසින් ජීවනෝපාය ආධාර ලෙස සපයනු ලබයි. ඉතිරි රුපියල් 200 වැවිලි සමාගම් විසින් දරනු ලැබේ. එමෙන්ම ඉන්දීය රජයේ සහාය ඇතිව වතු කම්කරුවන් සඳහා නිවාස සහ ඉඩම් හිමිකම් ලබාදීමේ වැඩසටහන කඩිනම් කර ඇති බවත්, මීට පෙර පැවති පර්චස් 7ක ඉඩම් කැබැල්ල වෙනුවට පර්චස් 10ක් ලබා දීමට රජය පියවර ගෙන ඇති බවත් අමාත්යවරයා පැවසීය.
වතු කම්කරුවන් බලහත්කාරී ශ්රමයට සමාන අයුතුකම්වලට ලක්වන බවට ඇම්නෙස්ටි ඉන්ටර්නැෂනල් වාර්තාව මගින් නගා ඇති චෝදනා සම්බන්ධයෙන් අමාත්යවරයා අවධාරණය කළේ, රජය සෑම විටම කම්කරු අයිතිවාසිකම් සුරක්ෂිත කිරීමට කැපවී සිටින බවයි. දැනට පවතින වැවිලි සමාගම් සහ රාජ්ය වැවිලි ආයතන යටතේ සේවය කරන කම්කරුවන් දහස් ගණනකගේ දත්ත සහ වතු අංශයේ ව්යුහය පිළිබඳව ද අමාත්යවරයා එහිදී කරුණු පැහැදිලි කළේය.
