ශ්රී ලංකාවේ සංස්කෘතික අනන්යතාවයේ මූලික පදනම වන සිංහල අලුත් අවුරුදු චාරිත්ර වාරිත්ර, බෞද්ධ විහාරස්ථාන කේන්ද්ර කරගනිමින් සහ මහා සංඝරත්නයේ මගපෙන්වීම යටතේ වසර දහස් ගණනාවක් තිස්සේ සුරැකී පවතින බව අමෙරිකා එක්සත් ජනපදයේ ශ්රී ලංකා තානාපති මහින්ද සමරසිංහ මහතා ප්රකාශ කර සිටියි. ඉතිහාසයේ විවිධ අවස්ථාවලදී සමාජය මෙම දීර්ඝකාලීන සිංහල බෞද්ධ සංස්කෘතික සම්ප්රදායන්ගෙන් ඈත් කිරීමට විවිධ බලවේග උත්සාහ කළද, එම සාරධර්ම තවමත් නොනැසී පවතින බව ඔහු අවධාරණය කළේය.
අප්රේල් 12 වනදා මෙරිලන්ඩ් (Maryland) ජාත්යන්තර බෞද්ධ විහාරස්ථානයේ පැවැත්වූ බක්මහ උළෙලට සහභාගී වෙමින් තානාපතිවරයා මෙම අදහස් පළ කළේය. අලුත් අවුරුදු චාරිත්ර ශ්රී ලාංකිකයන්ගේ විනයගරුක සහ සාමකාමී ජීවන රටාවට මහෝපකාරී වන වටිනා උරුමයක් බවත් ඔහු එහිදී පෙන්වා දුන්නේය.
අමෙරිකා එක්සත් ජනපදයේ ප්රධාන අධිකරණ සංඝනායක අතිපූජ්ය කටුගස්තොට උපරතන නායක හිමිපාණන්ගේ අනුශාසකත්වයෙන් පැවැත්වූ මෙම උළෙල, හෙළ සිරිත් විරිත් සහ සාම්ප්රදායික ජන ක්රීඩා රැසකින් වර්ණවත් විය. වොෂින්ටන් නුවර ශ්රී ලංකා තානාපති කාර්යාලයේ නිලධාරීන්, දහම් පාසල් සිසුන් සහ ප්රදේශයේ වෙසෙන ශ්රී ලාංකිකයින් විශාල පිරිසක් මෙම අවස්ථාවට එක්ව සිටියහ.
