ශ්රී ලංකා ගමනාගමන මණ්ඩලයේ (ලංගම) මහනුවර ප්රාදේශීය බලප්රදේශයට අයත් ඩිපෝ කිහිපයක සේවකයින් පිරිසක් වෛද්යවරයෙකුගේ නිල මුද්රාව සහ අත්සන ව්යාජ ලෙස යොදාගනිමින් සේවා ස්ථානය මගහැරීමේ දැවැන්ත වංචාවක් අනාවරණය වී තිබේ. මෙම සිදුවීම හේතුවෙන් ඩිපෝ කිහිපයක බස් රථ 30කට ආසන්න සංඛ්යාවක් ධාවනයෙන් ඉවත් කිරීමට සිදුවීමත් සමඟ මහජන ප්රවාහන සේවයට බරපතළ බාධාවක් එල්ල වී ඇත.
මෙම වංචාව පිළිබඳව තොරතුරු අනාවරණය කරගෙන ඇත්තේ තෙල්දෙණිය ඩිපෝ කළමනාකාරවරයා විසිනි. සේවකයින් විසින් අසනීප නිවාඩු ලබාගැනීම සඳහා ඉදිරිපත් කළ වෛද්ය සහතිකවල සත්යතාව පිළිබඳව ඔහු තුළ ඇති වූ සැකය මත සිදු කළ මූලික විමර්ශනයකදී, එම සහතික ව්යාජ ලෙස සකස් කර ඇති බව තහවුරු වී ඇත. මෙම සේවකයින් නිරන්තරයෙන් මෙවැනි ව්යාජ සහතික භාවිතා කරමින් සේවයට වාර්තා නොකර නිවාඩු ලබාගෙන ඇති බවට මූලික පරීක්ෂණවලදී අනාවරණය වී තිබේ.
මෙම ව්යාජ සහතික ජාවාරම සම්බන්ධයෙන් අදාළ ප්රාදේශීය ඩිපෝවල සේවකයින් රැසක් සැකපිට ප්රශ්න කිරීමට නියමිතය. ලංගම බලධාරීන් පවසන්නේ ව්යාජ ලේඛන සකස් කිරීම බරපතළ අපරාධයක් බැවින්, වරදකරුවන් වන සේවකයින්ට එරෙහිව දැඩි විනයානුකූල පියවර ගැනීමට අමතරව පොලිසිය හරහා නීතිමය ක්රියාමාර්ග ගැනීමට ද කටයුතු කරන බවයි. ඉදිරියේදී සේවකයින් ඉදිරිපත් කරන සියලුම වෛද්ය සහතිකවල නිරවද්යතාව සත්යාපනය කිරීම සඳහා විශේෂ වැඩපිළිවෙළක් ක්රියාත්මක කිරීමට මණ්ඩලය තීරණය කර ඇත.
