රාජ්ය ව්යවසායකත්වයේ කාර්යභාරය හුදු වාර්ෂික ලාභ-අලාභ පත්රයකට පමණක් සීමා කළ නොහැකි බවත්, සීනි කර්මාන්තය වැනි ක්ෂේත්ර ජාතික සහ ග්රාමීය ආර්ථිකයට වසරකට අවම වශයෙන් රුපියල් බිලියන 11ක සෘජු ආර්ථික අගයක් එක් කරන බවත් කර්මාන්ත හා ව්යවසායකත්ව සංවර්ධන නියෝජ්ය අමාත්ය චතුරංග අබේසිංහ මහතා පෙන්වා දෙයි. මෑතකදී සීනි කර්මාන්තය සම්බන්ධයෙන් සමාජය තුළ ගොඩනැඟී ඇති “කලින් ලාභයි, දැන් අලාභයි” යන සරල මතවාදය අභියෝගයට ලක් කරමින් අමාත්යවරයා අවධාරණය කරන්නේ, රාජ්ය දේපළවල වටිනාකම මැනිය යුත්තේ ඒවා රටේ ආර්ථිකයට සහ මහජනතාවට ලබාදෙන අස්පර්ශනීය සේවා සහ සහනදායී බලපෑම පදනම් කරගනිමින් බවයි.
දැනට පවතින වෙළෙඳපොළ ඒකාධිකාරය සහ අතරමැදියන් විසින් පාරිභෝගිකයා සූරාකෑමට ලක් කිරීමේ ක්රියාවලියට තිත තැබීම සඳහා, සීනි සමාගම සෘජු සිල්ලර වෙළෙඳාමට පිවිසීමට තීරණය කර ඇත. තොග වෙළෙඳපොළේ රුපියල් 205ක් වැනි මිලකට අලෙවි වන සීනි, පැකට් කිරීමේ ක්රියාවලිය හරහා පාරිභෝගිකයා අතට පත්වන විට රුපියල් 270ත් 320ත් අතර අසාධාරණ මිලකට ඉහළ යෑම බරපතළ ආර්ථික ගැටලුවක් බව හඳුනාගෙන ඇති අතර, මේ සඳහා කඩිනම් විසඳුම් ලබාදීමට කටයුතු සැලසුම් කර තිබේ.
මෙම නව වැඩපිළිවෙළ යටතේ නුගේගොඩ පිහිටි සීනි කඩේ පරිශ්රය කොළඹ කේන්ද්රීය මෙහෙයුම් මධ්යස්ථානය ලෙස සංවර්ධනය කෙරෙන අතර, එතැන් සිට දේශීය දුඹුරු සීනි ඇතුළු අත්යවශ්ය භාණ්ඩ සමපෝෂ, මිල්කෝ සහ එන්.එල්.ඩී.බී වැනි රාජ්ය අලෙවිසැල් ජාල හරහා ජනතාවට සහන මිලට ලබාදීමට පියවර ගැනේ. මීට සමගාමීව, නූතන තාක්ෂණය හා බද්ධ වෙමින් ඔන්ලයින් වෙළෙඳ වේදිකාවලින් ඇණවුම් කරන භාණ්ඩ ලබාගැනීමේ මධ්යස්ථානයක් (Pickup Point) ලෙස ද මෙම පරිශ්රය භාවිත කිරීමට නියමිත අතර, එය පාරිභෝගිකයාට වඩාත් පහසු සහ කාර්යක්ෂම සේවාවක් සහතික කරනු ඇත.
