විවිධ පළාත්වල ගුරු මාරුවීම් ක්රියාවලිය මේ වන විට දේශපාලනීකරණය වී ඇති බවත්, ස්ථාපිත ප්රතිපත්ති රාමුව උල්ලංඝනය කරමින් දේශපාලන බලපෑම් සහිත කමිටු මගින් එම කටයුතු සිදු කෙරෙන බවත් ලංකා ගුරු සංගමයේ (CTU) සභාපති ප්රියන්ත ප්රනාන්දු මහතා පවසයි.
පසුගිය වසරේ (2025) ජාතික පාසල් ගුරු මාරුවීම් වැඩසටහන යටතේ සිදු විය යුතු මාරුවීම් පවා මෙතෙක් අවසන් කර නොමැති බව ඔහු පෙන්වා දෙයි. සාමාන්යයෙන් එවැනි මාරුවීම් වසර අවසන් වීමට පෙර අවසන් කළ යුතු වුවද, මේ වන විට 2026 වසරේ මාරුවීම් සඳහා අයදුම්පත් කැඳවිය යුතු කාලය පැමිණ ඇතත් පෙර වසරේ කටයුතු පවා අඩපණ වී ඇතැයි ඔහු සඳහන් කළේය.
පළාත් සභා තුළ පවතින අක්රමවත් තත්ත්වය හමුවේ, ගුරු මාරුවීම් සඳහා පවතින 20/2007 දරන චක්රලේඛය බොහෝ පළාත්වල නිසි පරිදි ක්රියාත්මක නොවන බව ප්රනාන්දු මහතා චෝදනා කරයි. උතුරු මැද පළාත ඇතුළු ඇතැම් පළාත්වල ආණ්ඩුකාරවරුන්ගේ මැදිහත්වීම් ඇතුළු දේශපාලන බලපෑම් හරහා ගුරු මාරුවීම් සිදු කෙරෙන බවද ඔහු වැඩිදුරටත් කියා සිටියේය.
මෙම චෝදනා සම්බන්ධයෙන් අධ්යාපන අමාත්යාංශයේ ලේකම් නාලක කලුවැව මහතාගෙන් විමසීමට උත්සාහ කළද, ඒ මහතා ප්රතිචාර දක්වා නොමැත.
