ශ්රී ලංකාවේ ප්රවාහන ක්ෂේත්රයේ ප්රධාන මෙහෙවරක් ඉටු කරන ත්රිරෝද රථ රියදුරන් දීර්ඝ කාලීනව ඉන්ධන මගින් ක්රියාත්මක වන සාම්ප්රදායික ත්රිරෝද රථ පැදවීම හේතුවෙන් විවිධ සෞඛ්ය ගැටලුවලට මුහුණ දෙන බව නවතම අධ්යයනයන් මගින් හෙළි වී තිබේ. එන්ජින් කම්පනයට (Vibrations) නිරන්තරයෙන් නිරාවරණය වීම, දීර්ඝ කාලීන රිය පැදවීම සහ නිවැරදි නොවන ඉරියව් නිසා රියදුරන් අතර කොන්දේ අමාරුව ඇතුළු පේශි හා අස්ථි ආශ්රිත රෝග (Musculoskeletal disorders) බහුලව දක්නට ලැබෙන බව වෘත්තීය සෞඛ්ය පිළිබඳ ශ්රී ලංකා සඟරාව පෙන්වා දෙයි. මෙම පසුබිම තුළ පාරිසරික හිතකාමී මෙන්ම රියදුරු සෞඛ්යයට ද හිතකර විකල්පයක් ලෙස විදුලි ත්රිරෝද රථ (Electric Three-wheelers) කෙරෙහි වර්තමානයේ වැඩි අවධානයක් යොමු වෙමින් පවතී.
විදුලි ත්රිරෝද රථවල පවතින විශේෂත්වය වන්නේ සාම්ප්රදායික එන්ජින්වල මෙන් අඛණ්ඩ කම්පනයක් ඇති නොවීමයි. එමගින් රියදුරුගේ ශරීරයට ඇති වන දැඩි පීඩනය අවම වන අතර වඩාත් සුවපහසු රිය පැදවීමේ අත්දැකීමක් ලබා දෙයි. එසේම නවීන විදුලි ත්රිරෝද රථ නිර්මාණය කිරීමේදී රියදුරුගේ පහසුව සහ නිවැරදි ඉරියව් පවත්වා ගැනීම සඳහා වඩාත් දියුණු ආසන පද්ධති ද ඇතුළත් කර තිබේ. පාරිසරික වශයෙන් වාතයේ ගුණාත්මකභාවය ඉහළ නැංවීමට සහ විමෝචනය අවම කිරීමට මෙන්ම, රියදුරන්ගේ සෞඛ්යය, මෙහෙයුම් පිරිවැය අවම වීම සහ දීර්ඝ කාලීන පැවැත්ම යන කරුණු මත විදුලි ත්රිරෝද රථ ශ්රී ලංකාවේ ප්රවාහන ක්ෂේත්රයේ ඉදිරි ගමනට තීරණාත්මක බලපෑමක් කරනු ඇතැයි අපේක්ෂා කෙරේ.
