එක්සත් ජාතීන්ගේ යෝජනා අංක 2793ට අනුව, අපරාධ සහ කල්ලි ගැටුම් බහුල හයිටි රාජ්යයේ නීතිය හා සාමය තහවුරු කිරීම සඳහා ශ්රී ලංකා රජය විසින් 1,000කට අධික සාමසාධක බළඇණියක් යෙදවීමට සූදානම් වේ.
මෙම බළඇණිය ශ්රී ලංකා යුද හමුදාවේ 900කට අධික පිරිසක් සහ පොලිස් විශේෂ කාර්ය බලකායේ 189 දෙනෙකුගෙන් සමන්විත වේ. ශ්රී ලංකා යුද හමුදා ඉතිහාසයේ පළමු වරට කාන්තා සටන් ඉංජිනේරු බලඇණියක් මෙම මෙහෙයුමට එක්වීමට නියමිත අතර, ඔවුන්ගේ ප්රධාන රාජකාරිය වනුයේ බිම් බෝම්බ සහ පුපුරණ ද්රව්ය අක්රිය කිරීමයි.
මෙය සම්ප්රදායික සාම සාධක මෙහෙයුමකට වඩා වෙනස් වන අතර, එක්සත් ජාතීන්ගේ අනුග්රහයෙන් සහ ඇමරිකාව ප්රමුඛව ක්රියාත්මක වන ‘කල්ලි මර්දන බලකායට’ (GSF) සහය වෙමින් හයිටි රාජ්යයේ නීතිය සහ සාමය තහවුරු කිරීම මෙහි අරමුණයි.
මේ වන විට භට පිරිස්වල මානව හිමිකම් පරීක්ෂාවන් අවසන් අදියරේ පවතී. කුකුළේගඟ පිහිටි සාම සාධක මෙහෙයුම් පුහුණු ආයතනයේදී ඔවුන්ගේ පුහුණුවීම් සිදුකෙරෙන අතර, ඉදිරි සති කිහිපය තුළ එක්සත් ජාතීන්ගේ කණ්ඩායමක් විසින් උපකරණ පරීක්ෂාවක් සිදු කිරීමට නියමිතය. මෙම මෙහෙයුම සඳහා ඉන්දියාව විසින් ඇමරිකානු ඩොලර් මිලියන 5ක් වටිනා යුද උපකරණ සහ සැපයුම් ලබා දී ඇත. මීට අමතරව පාකිස්තානයෙන් ද අවශ්ය තාක්ෂණික සහය ලැබී තිබේ.
මෙම බළඇණිය පාබල සටන් රථ සහ දේශීයව නිෂ්පාදිත ‘යුනිබෆල්’ සන්නද්ධ රථවලින් සමන්විත වේ. මෙම බළඇණිය ජූලි මස අග වන විට යෙදවීමට සූදානම් වනු ඇතැයි ආරක්ෂක අමාත්යාංශය පවසයි. හයිටි රාජ්යය ඉදිරි අගෝස්තු/සැප්තැම්බර් මාසවලදී මැතිවරණ පැවැත්වීමට සැලසුම් කර ඇති අතර, ඒ සඳහා රටේ පවතින නීති විරෝධී තත්ත්වය පාලනය කිරීම අත්යවශ්ය වී තිබේ.
