දුම්කොළ සහ මධ්යසාර පිළිබඳ ජාතික අධිකාරිය (NATA) විසින් යෝජනා කර ඇති, 2010 වසරෙන් පසු උපත ලැබූවන් සඳහා දුම්කොළ නිෂ්පාදන අලෙවිය තහනම් කිරීමේ ප්රතිපත්තිය (Tobacco-Free Generation) මේ වසර (2026) අවසන් වීමට පෙර නීතිගත කිරීමට අපේක්ෂා කෙරේ.
මෙම යෝජනාවේ ප්රධාන අරමුණ වන්නේ “දුම්කොළවලින් තොර පරපුරක්” බිහි කිරීම සහ අනාගත පරපුර දුම්වැටිවලට ඇබ්බැහි වීමෙන් මුදවා ගැනීමයි. මෙම ප්රතිපත්තිය යටතේ 2010 ජනවාරි 1 දින හෝ ඉන් පසු උපත ලැබූ ඕනෑම පුද්ගලයෙකුට නීත්යානුකූලව දුම්කොළ නිෂ්පාදන මිලදී ගැනීමට ඇති අයිතිය සදහටම අහිමි වේ.
ප්රතිපත්තිය කෙටුම්පත් කිරීමේ අවසන් අදියරේ පවතින අතර, එය කඩිනමින් අමාත්ය මණ්ඩලයට ඉදිරිපත් කිරීමට නියමිතය. ඉන් අනතුරුව පාර්ලිමේන්තුවේදී සම්මත කර ගැසට් කිරීමට කටයුතු යොදා ඇත. ශ්රී ලංකාවේ සිදුවන මරණවලින් සැලකිය යුතු ප්රමාණයක් බෝනොවන රෝග නිසා සිදුවන අතර, දුම්කොළ සහ මධ්යසාර ඊට ප්රධාන හේතුවක් වී තිබේ. වසරකට දුම්කොළ සහ මධ්යසාර භාවිතය නිසා ශ්රී ලංකාවේ පුද්ගලයින් 22,000ක් පමණ ජීවිතක්ෂයට පත්වන බව දත්ත පෙන්වා දෙයි.
දුම්කොළ සමාගම්වලින් එල්ල විය හැකි බලපෑම් සහ අභියෝග මධ්යයේ වුවද, ශ්රී ලංකා වෛද්ය සංගමය සහ අනෙකුත් විද්වත් සංවිධානවල ද සහාය ඇතිව මෙම ජාතික වැඩපිළිවෙළ ක්රියාත්මක කිරීමට NATA සභාපති විශේෂඥ වෛද්ය ආනන්ද රත්නායක මහතා ඇතුළු බලධාරීන් දැඩි අධිෂ්ඨානයකින් කටයුතු කරයි.
