ශ්රී ලංකාවේ මූල්ය පද්ධතියේ ආරක්ෂාව බිඳ දමමින් ඩොලර් මිලියන 2.5ක අතිවිශාල මුදලක් හැකර්වරුන් විසින් සොරාගෙන ඇතත් ඒ සම්බන්ධයෙන් වගකීමක් ගැනීමට මෙතෙක් කිසිදු දේශපාලනඥයෙක් හෝ රජයේ නිලධාරියෙක් ඉදිරිපත් වී නොමැති බවට අතිශය බරපතළ චෝදනාවක් අද එල්ල විය. මහජනතාවගේ රුධිරයෙන් සහ දහඩියෙන් උපයාගත් මෙම ධනස්කන්ධය අන්තර්ජාල කොල්ලකරුවන් අතට පත්වෙද්දී බලධාරීන් දක්වන මන්දගාමී පිළිවෙත සහ නිහඬතාවය පිටුපස ඇති සැබෑ රහස කුමක්දැයි හිටපු ආණ්ඩුකාර කීර්ති තෙන්නකෝන් මහතා ප්රශ්න කර සිටියි.
කොළඹ නිපොන් හෝටලයේ පැවති මාධ්ය හමුවකට එක්වෙමින් තෙන්නකෝන් මහතා අවධාරණය කළේ මුදල් අමාත්යාංශ ලේකම්වරයා විසින් මේ සම්බන්ධයෙන් ඉදිරිපත් කළ බොහෝ කරුණු අමූලික බොරු බවයි. මුදල් අමාත්යාංශය, මහා භාණ්ඩාගාරය සහ ශ්රී ලංකා මහ බැංකුව යන ඉහළම මූල්ය ආයතන තුනම මෙම අසාර්ථකත්වය සම්බන්ධයෙන් සෘජුවම වගකිව යුතු බවත් මෙම දැවැන්ත මූල්ය වංචාවේදී සිදුවූ වැරදි පිළිබඳව රටටත් පාර්ලිමේන්තුවටත් වහාම පැහැදිලි කළ යුතු බවත් ඔහු වැඩිදුරටත් කියා සිටියේය.
මෙම සිදුවීම හුදෙක් තාක්ෂණික දෝෂයක් නොව රටේ මූල්ය ස්වෛරීභාවයට එල්ල වූ මරු පහරක් ලෙස හඳුනාගත හැකි අතර මෙවැනි මංකොල්ලයන් හමුවේ වගවීමට කිසිවෙකුත් නැතිවීම අතිශය භයානක තත්ත්වයකි. පද්ධතිය ඇතුළතින්ම සිදුවූ දුර්වලතා හරහා ජාතික ධනය විදේශීය කොල්ලකරුවන් සතු වෙද්දී ඊට වගකිවයුතු බලධාරීන් තවදුරටත් පුටුවලට වී නිහඬව සිටිය යුතුද යන්න තීරණය කළ යුත්තේ රටේ ජනතාවයි. යුක්තිය සහ විනිවිදභාවය නොමැති තැන රටේ අනාගතය අඳුරු වන බව අප සැවොම වටහාගත යුතුව ඇත.
