කාර්මික පරිවර්තනය සඳහා ආයතනික සහ තාක්ෂණික ධාරිතාව ශක්තිමත් කර ගැනීම අරමුණු කරගනිමින්, ශ්රී ලංකාවේ එක්සත් ජාතීන්ගේ සංවර්ධන වැඩසටහන (UNDP) සහ කර්මාන්ත හා ව්යවසායකත්ව සංවර්ධන අමාත්යාංශය අතර උපායමාර්ගික හවුල්කාරීත්වයක් ඇති කර ගෙන තිබේ.
කාර්මික සංවර්ධනය වේගවත් කිරීම, ව්යවසායකත්වය සහ කුඩා හා මධ්ය පරිමාණ ව්යාපාරවල (SME) තරඟකාරීත්වය ඉහළ නැංවීම සහ සාක්ෂි මත පදනම් වූ ප්රතිපත්ති සම්පාදනය තීව්ර කිරීම සඳහා විශේෂඥ සහයෝගතා ඒකකයක් (Expert Support Unit) පිහිටුවීම මෙම සහයෝගීතාවට ඇතුළත් වේ. ව්යවසායකත්ව සංවර්ධන අමාත්යාංශයේ ලේකම් ජේ. එම්. තිලකා ජයසුන්දර සහ ශ්රී ලංකාවේ UNDP නේවාසික නියෝජිත අසුසා කුබොට යන මහත්ම මහත්මීන් විසින් නියෝජ්ය අමාත්ය චතුරංග අබේසිංහ මහතාගේ ප්රධානත්වයෙන් මෑතකදී මේ සඳහා අවබෝධතා ගිවිසුමකට (MoU) අත්සන් තබන ලදී.
කුඩා හා මධ්ය පරිමාණ ව්යාපාර සංවර්ධනය, කාර්මික කලාප සංවර්ධනය, වෙළඳ සහ ප්රතිපත්ති, ඩිජිටල් පරිවර්තනය, දත්ත විශ්ලේෂණය, කුසලතා සංවර්ධනය සහ ජාත්යන්තර සබඳතා යන ප්රමුඛතා ක්ෂේත්ර හරහා උසස් තත්ත්වයේ තාක්ෂණික, විශ්ලේෂණ සහ සම්බන්ධීකරණ විශේෂඥ දැනුමක් ලබා දීම මෙම විශේෂඥ ඒකකය හරහා අමාත්යාංශය තුළ සිදු කෙරේ.
මෙම නව හවුල්කාරීත්වය පිළිබඳව අදහස් දක්වමින් කර්මාන්ත හා ව්යවසායකත්ව සංවර්ධන නියෝජ්ය අමාත්ය චතුරංග අබේසිංහ මහතා සඳහන් කළේ, ශ්රී ලංකාවේ කාර්මික වර්ධනය, ව්යවසායකත්ව සංවර්ධනය සහ අපනයන තරඟකාරීත්වය ළඟා කර ගැනීම සඳහා නිවැරදි විශේෂඥ දැනුමෙන් සහ නව්ය ප්රවේශයන්ගෙන් සමන්විත ක්රියාශීලී ආයතන අවශ්ය වන බවයි. ජාතික ආර්ථික පරිවර්තනයට දායක වන බලපැවැත්වෙන විසඳුම් ලබා දීමටත්, අපගේ ව්යවසායකයන්ට සහ කර්මාන්තවලට සහය වීමටත් මෙම UNDP හවුල්කාරීත්වය ඉතා වැදගත් පියවරක් බවද හෙතෙම පැවසීය.
ශ්රී ලංකාවේ ප්රතිපත්තිමය ප්රතිසංස්කරණ න්යාය පත්රයට සහයෝගය දැක්වීමට ලැබීම පිළිබඳව ආඩම්බර වන බව ප්රකාශ කළ ශ්රී ලංකාවේ UNDP නේවාසික නියෝජිත අසුසා කුබොට මහත්මිය, මෙම විශේෂඥ සහයෝගතා ඒකකය හරහා රැකියා උත්පාදනය කිරීමටත්, ගෝලීය වටිනාකම් දාමයන් සමඟ ශ්රී ලංකාව ඒකාබද්ධ කිරීමටත්, තිරසාර ආර්ථික වර්ධනයක් වේගවත් කිරීමටත් හැකි වනු ඇතැයි අපේක්ෂා කරන බව සඳහන් කළාය.
